14 ქულა, 10 მოხსნა, 3 დაფარება – ასეთია გოგა ბითაძის მონაგარი „ინდიანა პეისერსის“ შემადგენლობაში, სადაც მისმა გუნდმა „შარლოტ ჰორნეტსს“ გადაურბინა და 144:117 დაამარცხა.
საქართველოს ნაკრების ცენტრმა პარკეტზე 18 წუთზე ოდნავ მეტი დაჰყო და ამ დროის მანძილზე ერთ-ერთი საუკეთესო იყო. გოგა ბითაძემ ინდიანაპოლისელთა ამ საჭირო გამარჯვებაში მნიშვნელოვანი წვლილი შეიტანა.
ნბა-ს მიმდინარე გათამაშება ახალი ფორმატით მიმდინარეობს და ამ მატჩში წაგება „ინდიანა პეისერსისთვის“ სეზონის დასრულებას ნიშნავდა.
ნბა-ს პლეი ოფში პირდაპირი გზით თითო კონფერენციის 6-6 საუკეთესო გუნდი გავიდა. კონფერენციებში 7, 8, 9 და 10 ადგილებზე გასული გუნდები კი საკვალიფიკაციო რაუნდს თამაშობენ პლეი ოფში დარჩენილი 2 ადგილის შესავსებად. ინდიანამ აღმოსავლეთ კონფერენციაში მე-9 ადგილი დაიკავა და პირველ საკვალიფიკაციო მატჩში მე-10-ზე გასულ შარლოტ ჰორნეტსს შეხვდა.
სწორედ ამ შეხვედრაში დააფიქსირა ბითაძემ ნბა-ს კარიერის საუკეთესო შედეგი. აღსანიშნავია, რომ მიმდინარე სეზონში ქართველმა კალათბურთელმა პირველად მიაღწია 10-მოხსნიან ბარიერს.
