პრემიერლიგაში ბოლო პერიოდის წარუმატებლობის ფონზე, „ლივერპულისთვის“ ჩემპიონთა ლიგა მშვენიერი რეაბილიტაცია გამოდგა. მერსისაიდელებმა პლეიოფის 1/8 ფინალის პირველ მატჩში „ლაიპციგი“ გასვლაზე 2:0 დაამარცხეს.
გერმანელები ნომინალურ მასპინძლებად ითვლებოდნენ, რადგან მატჩი არა მათ მშობლიურ არენაზე, არამედ ბუდაპეშტში გაიმართა.
მატჩის შემდეგ კმაყოფილი ჩანდა იურგენ კლოპი.
„ეს გამარჯვება აუცილებლად გვჭირდებოდა. პირველ რიგში ფსიქოლოგიური თვალსაზრისით, რადგან ჩემპიონატში რამდენიმე მტკივნეული მარცხი განვიცადეთ. რწმენის დასაბრუნებლად ეს მნიშვნელოვანი მოგება იყო.
ლაიპციგი კარგი გუნდია. მათ ნებისმიერი მეტოქის დამარცხება შეუძლიათ და თან ისე რომ გაანადგურონ, თუმცა დღეს მათ სწორი ტაქტიკა დავუპირისპირეთ, რამაც შედეგი გამოიღო.
მართალია, განმეორებითი მატჩის წინ სოლიდური უპირატესობა გვაქვს, მაგრამ დამთავრებული ჯერ არაფერია. ყურადღება არ უნდა მოვადუნოთ. ალბათ ბევრი ფიქრობდა, რომ წავაგებდით, რადგან კრიზისული პერიოდი გვიდგას. ლივერპულმა კიდევ ერთხელ უჩვენა ყველას თავისი ძალა“ – თქვა პრესკონფერენციაზე იურგენ კლოპმა.
