კატალონიური გუნდი ჩემპიონთა ლიგის გამარჯვებულია. მიხვდებოდით, ქალთა ფეხბურთს ვგულისხმობთ, თორემ მესი და კომპანია მიმდინარე სეზონში ევროპის ყველაზე პრესტიჟულ საკლუბო ტურნირს ნაადრევად გამოეთიშნენ.
„ბარსელონას“ ქალთა გუნდმა ჩემპიონთა ლიგის 2020/2021 წლების გათამაშება უმაღლეს დონეზე ჩაატარა, მოწოდების სიმაღლეზე იყო და ტიტულსაც დამსახურებულად დაეუფლა.
ფინალური მატჩი შვედეთის ქალაქ გიოტებორგში გაიმართა, ხოლო ესპანური გუნდის მეტოქე „ჩელსი“ გახლდათ. კატალონიელმა მობურთალმა გოგონებმა, ლონდონელებს კუდით ქვა ასროლინეს და 4:0 გაანადგურეს.
ქალთა შორის, ჩემპიონთა ლიგის გამარჯვებული ბოლო 5 წლის მანძილზე „ლიონი“ ხდებოდა. წლეულს კი „ბარსელონამ“ ფრანგული გუნდის ჰეგემონიაც დაამხო.
ქალთა შორის, უეფას ჩემპიონთა ლიგის გათამაშება 2001 წლიდან იმართება და „ბარსელონამაც“ აქ გამარჯვება ისტორიაში პირველად შეძლო.
