ფეხბურთის მოყვარულთათვის გერმანელების ბრძოლისუნარიანობა კარგად არის ცნობილი. ისინი არასოდეს ნებდებიან, ერთი შეხედვით გამოუვალ მდგომარეობაშიც კი ბოლომდე იბრძვიან.
მიუხედავად 1/4 ფინალში საკუთარ მოედანზე მარცხისა, დარწმუნებული ვართ „ბაიერნი“ ყურებს არ ჩამოყრის და განმეორებით მატჩში გამარჯვებას შეეცდება.
ჩემპიონთა ლიგის ჯერ კიდევ მოქმედმა ჩემპიონმა მიუნხენში „პსჟ“-სთან 2:3 წააგო და საქმე გაირთულა, თუმცა ჯერ არაფერი დასრულებულა.
იგივეს ფიქრობს „ბაიერნის“ მთავარი მწვრთნელი ჰანს დიტერ ფლიკი.
„შედეგი არაობიექტურად მიმაჩნია. უამრავი შანსი გავანიავეთ და მარცხს არ ვიმსახურებდით. მეტოქემ ძალიან მცირე მომენტებიდან კი 3 გოლი გაიტანა.
ჩემი ფეხბურთელებით ვამაყობ და მათი გარჯით კმაყოფილი ვარ. ბიჭებმა შთამბეჭდავად ითამაშეს, მაგრამ ეს ფეხბურთია. მოედანს ყოველთვის გამარჯვებული ვერ დატოვებ.
შეგვეძლო ტაბლოზე სხვა შედეგი დაგვეფიქსირებინა, მაგრამ წინ განმეორებითი მატჩია და გამარჯვებას იქ შევეცდებით“ – აღნიშნა რეკორდმაისტერის თავკაცმა.
