ოქროსბიჭუნა – ამ მეტსახელით შერაცხა ის ქართველმა გულშემატკივარმა, როდესაც ერთა ლიგის წინა გათამაშებაზე ეროვნული ნაკრების უპირობო ლიდერად მოგვევლინა. უფრო მეტიც – გიორგი ჩაკვეტაძე სულაც ისტორიაში შევიდა, როგორც უეფას ახლადდაარსებული ტურნირის, ერთა ლიგის გათამაშების პირველი გოლი ავტორი.
იმ გოლს კი რა დაგვავიწყებს. საქართველოს ნაკრებმა ასტანაში ყაზახეთის ნაკრებს 2:0 მოუგო, ანგარიში ულამაზესი ჩახვეული დარტყმით სწორედ ჩაკვეტაძემ გახსნა და საბოლოოდ იმ ჯგუფურ ეტაპზე ჩვენი გუნდის მთავარი საკვანძო ფიგურა გახდა.
სამწუხაროდ, გიორგი ჩაკვეტაძე საქართველოს ნაკრებს ტრავმის გამო ყველაზე მნიშვნელოვან დროს, 12 ნოემბერს ჩრდილოეთ მაკედონიასთან უპრინციპულეს მატჩში ვერ დაეხმარა. ვერ დავიჩემებთ, ის რომ მოედანზე ყოფილიყო რა შედეგი დადგებოდა, თუმცა მისი და ხვიჩა კვარაცხელია გამოკლება ჯვაროსნებისთვის უდიდესი დანაკლისი გამოდგა.
გიორგი ჩაკვეტაძე საახალწლო პერიოდში თბილისში იმყოფება და გადაცება „ტაიმაუტსაც“ სტუმრობდა, სადაც ნაკრებზე და სამომავლო გეგმებზე საინტერესო კომენტარი გააკეთა:
„არ მინდა დავიჯერო, რომ საქართველოს ნაკრები ერთი ან ორი კაცის გუნდია. შესაძლოა, ამა თუ იმ მატჩის ბედი სწორედ ერთი ფეხბურთელის ინდივიდუალურმა მოქმედებამ გადაწყვიტოს, მაგრამ მთლიანად ფეხბურთი გუნდური კომპონენტებისგან შედგება. თანაგუნდელების გარეშე შედეგი არ მიიღწევა.
ვლადიმირ ვაისის დიდი მადლობელი ვარ, რადგან სწორედ მან მომცა შანსი, მენდო და ძირითად შემადგენლობაში დამაყენა. ის უდავოდ მაღალი დონის მწვრთნელია, თუმცა ერთი ნაკლი კი ჰქონდა, შეცვლებს აგვიანებდა.
12 ნოემბერს ბელგიაში ვიყავი და ტელევიზორთან ვნერვიულობდი. მარცხი მეც მოედანზე მყოფი ბიჭების მსგავსად განვიცადე. ევროპის ჩემპიონატზე თამაში ჩემი დიდი ოცნებაა და სამწუხაროა, რომ ამჯერად ეს ნატვრა ვერ ავისრულე“ – თქვა გიორგი ჩაკვეტაძემ.
