მოახლოვდა ევროპის ჩემპიონატი, სადაც კონტინენტის 24 ნაკრებთან ერთად უელსის გუნდიც იასპარეზებს. თავისთავად, ბრიტანელთა მთავარი იმედი გარეთ ბეილია.
უელსელ ვარსკვლავს ბოლო პერიოდში კარიერა კი აეწეწა, თუმცა ის უდავოდ რჩება თანამედროვეობის ერთ-ერთ საუკეთესო ფეხბურთელად. შემთხვევითიც არ არის, რომ ბეილი უელსის ნაკრების კაპიტანია.
როგორი იქნება მისი მომავალი? რას აპირებს? რეალში დაბრუნდება, ტოტენჰემში დარჩება თუ სულაც ბურთის გორებას შეეშვება?
„ახლა მხოლოდ მოახლოებულ ევროპის ჩემპიონატზე ვფიქრობ. მსურს ამ მნიშვნელოვან საფეხბურთო ფორუმზე რაც შეიძლება წარმატებით ვითამაშოთ.
ცხადია, რომ მედია ჩემზე ბევრ ინფორმაციას ავრცელებს. პრესა ჩემი მომავლით ინტერესდება. არ მსურს ამ ეტაპზე რაიმე ისეთის თქმა, რაც მეტ ქაოსს გამოიწვევს.
მთლიანად ევროპის ჩემპიონატზე ვარ კონცენტრირებული. როდესაც ტურნირი დასრულდება შემდეგ დავფიქრდები ჩემს მომავალზე“ – ამბობს გარეთ ბეილი.
შეგახსენებთ, მადრიდის „რეალში“ მთავარ მწვრთნელად კარლო ანჩელოტი დაბრუნდა. იტალიელი სპეციალისტი ბეილის მიმართ კარგად იყო განწყობილი და მას მუდამ ძირითად შემადგენლობაში ათამაშებდა. არ არის გამორიცხული, კარლიტოს სამეფო გუნდში დაბრუნების ფონზე, ბეილმაც ისევ მადრიდს მიაშუროს.
