ბრენდან როჯერსი და იულიან ნაგელსმანი. ფეხბურთის გულშემატკივარი კარგად უწყის, რომ პირველი „ლესტერს“ ავარჯიშებს, მეორე კი გერმანულ „ლაიპციგს“ წრთვნის.
ეს ორი პერსონა ბრიტანულ პრესას შემთხვევით არ უხსენებია. ინგლისელი ჟურნალისტები სიტყვებს ჰაერზე არ ისვრიან და სულაც არ გაგვიკვირდება თუ უახლოეს ხანებში რომელიმე მათგანს „ტოტენჰემის“ მთავარი მწვრთნელის სავარძელში ჩასკუპებულს ვნახავთ.
დიახ, ჟოზე მოურინიოს განსაკუთრებული შემთხვევისთვის წინასწარ ამზადებენ. „განსაკუთრებულს“ როგორც ჟოზე საკუთარ თავს უწოდებს, ლონდონური გუნდის ბოსები აგუებენ, რომ თუ შედეგს არ გააუმჯობესებს პოსტის დატოვება მოუწევს და მას ზემოთ ნახსენები სპეციალისტიდან ერთ-ერთი შეცვლის.
„ტოტენჰემს“ კი კარგი დროება ნამდვილად არ უდგას. მოურინიოს გუნდმა პრემიერლიგაში ბოლო 5 მატჩიდან 4 წააგო და 36 ქულით სატურნირო ცხრილში მე-9 ადგილზეა. ლონდონელები ჩემპიონთა ლიგას ვინ დაეძებს, ევროტურნირების ზონასაც საკმაოდ გვარიანად – 6 ქულით ჩამორჩება. გუნდი ინგლისის თასიდანაც ნაადრევ ეტაპზე გამოვარდა, როდესაც „ევერტონთან“ 4:5 წააგო. ერთადერთი გამონათება „ტოტენჰემს“ ევროპა ლიგაზე ჰქონდა, როდესაც პლეიოფის პირველ დაპირისპირებაში ავსტრიულ „ვოლსბერგერს“ სტუმრად 4:1 მოუგო.
