მსოფლიო ფეხბურთის მმართველმა ორგანომ 2022 წლის მსოფლიო ჩემპიონატზე დასასწრები ბილეთების გაყიდვა დაიწყო.
უცხოელი გულშემატკივრებისთვის ბილეთის ფასი 69 დოლარი იქნება, რაც რუსეთში ჩატარებულ მუნდიალზე 36 დოლარით ნაკლებია. აღნიშნული საფასური მხოლოდ მესამე კატეგორიაზე ვრცელდება. პირველი და მეორე კატეგორიის ფასები ჯერჯერობით ცნობილი არ არის.
რაც შეეხება ადგილობრივებს, ყატარის მოსახლეობაზე მეოთხე კატეგორიის ბილეთები გაიყიდება და ფასი 11 დოლარი იქნება, რაც რუსეთში ჩატარებული მუნდიალის ფასისგან დაახლოებით ორჯერ ნაკლებია.
ცნობისთვის, ყატარის მსოფლიო ჩემპიონატზე დასასწრები ბილეთების ფასები 1986 წელს, მექსიკის მუნდიალის შემდეგ ყველაზე იაფი იქნება. მექსიკაში ბილეთების მინიმალური ფასი 4 დოლარი იყო.
შეგახსენებთ, რომ მუნდიალი 2022 წლის 21 ნოემბრიდან 18 დეკემბრის ჩათვლით გაიმართება.
