მე განსაკუთრებული ვარო, თქვა მან ერთხელ და საფეხბურთი სამყარო ამ ფრაზებით აალაპარაკა, თუმცა მისმა სამწვრთნელო საქმიანობამ მართლა ცხადყო, რომ ეს სიტყვები უბრალოდ არ წამოუროშავს. ის მართლაც განსაკუთრებულია თავისი ექსტრავაგანტულობით, ტაქტიკური განსწავლულობით, სამწვრთნელო ალღოთი, სიფიცხით და არაერთი სხვა თვისებით, რომლითაც სხვა სპეციალისტებისგან გამოირჩევა.
მედიასთან ურთიერთობაც არასდროს ყოფილი ჟოზე მოურინიოს სუსტი მხარე. უფრო სწორად, შეიძლება ითქვას, რომ მას ჟურნალისტები დიდად გულზე არ ეხატება და არაერთხელაც გაუკრიტიკებია. ამჯერად, „ტოტენჰემის“ დამრიგებელმა სტატისტიკოსებს შეუტია:
„თქვენ მოგწონთ სიტყვა „ბურთის ფლობა“ და სტატისტიკა. ხანდახან ამბობთ, რომ ფეხბურთელმა მატჩში პასების 92%-იანი სიზუსტე გვიჩვენა. ეს ყველაფერი მათ ეფექტურობაზე მიუთითებს.
თუმცა სტატისტიკა არ ამბობს, რომ ამ კონკრეტულმა ფეხბურთელმა პასი ორ მეტრში გააკეთა. სტატისტიკა იმასაც არ ამბობს, რომ ეს არის ცენტრალური მცველი, რომელიც პასს მეორე მცველს აძლევს. ამასობაში, სხვა ფეხბურთელი 60 მეტრიან პასს აკეთებს, რომ შეტევის მიმართულება შეცვალოს. სხვები კიდევ 65%-იანი სიზუსტით საგოლე გადაცემებს აკეთებენ.
ასე რომ, სტატისტიკა ხშირად ჰგავს ხორცის ან თევზის კარგ ნაჭერს, რომელიც ცუდად არის მომზადებული. ის ბევრს არაფერს ამბობს. მე გოლების რაოდენობა და შექმნილი შანსები გაცილებით მეტს მეუბნება.
თქვენ შეიძლება მეტოქეზე ნაკლებად ფლობდეთ ბურთს, მაგრამ მათზე მეტი მომენტი შექმნათ და გაიტანოთ. ამიტომ, ეს ჩემთვის ფუნდამენტური არ არის“ – ამბობს ჟოზე მოურინიო.
