ფეხბურთელების სახლების ძარცვა არახალი ამბავია. თვე არ გავა, ამა თუ იმ გამორჩეული თუ შედარებით ნაკლებად ცნობადი ფეხბურთელის ბინის თუ ვილის გაქურდვის შესახებ არ გავიგოთ.
უმეტესწილად, მსგავსი ტიპის ძარცვები მაშინ ხდება, როდესაც სახლში არავინ იმყოფება, თუმცა ერან ზაჰავის შემთხვევაში განსხვავებულ ხელწერასთან გვაქვს საქმე.
ნიდერლანდური „პსვ ეინდჰოვენის“ ფეხბურთელი, „ვილემ 2“-თან ჩემპიონატის 32-ე ტურის მატჩის სათამაშოდ გუნდთან ერთად ავტობუსით მიემართებოდა, როდესაც მას მეუღლემ დაურეკა და შეატყობინა რომ სახლში მძარცველები შეიჭრნენ.
ბუნებრივია, ზაჰავი უმალ ამსტერდამში, სახლისკენ გაეშურა. გავრცელებული ინფორმაციით დამნაშავეებმა ზაჰავის ოჯახის წევრები მძევლად აიყვანეს, ფეხბურთელის ცოლი სკამზე გაკოჭეს და მას თმაც მოაჭრე. ამ ყველაფერს კი მცირეწლოვანი შვილებიც უყურებდნენ.
ნიდერლანდელი სამართალდამცავების თქმით ფეხბურთელის ცოლ-შვილს რაიმე საფრთხე აღარ ემუქრებათ, ხოლო სახლიდან სამხილები უკვე ამოღებულია და გამოძიება მიმდინარეობს.
