გერმანული ფეხბურთის დონე მსოფლიოში ერთ-ერთი საუკეთესოა, რაც მათ შედეგებზეც მეტყველებს როგორც საკლუბო, ისე სანაკრებო დონეზე. ბუნდესლიგაში მოასპარეზე გუნდები რეგულარულად თამაშობენ ევროტურნირებზე – ჩემპიონთა ლიგაზე, ევროპა ლიგაზე და ახლა უკვე კონფერენს ლიგაზეც.
გერმანიაში არაერთი ქართველი ფეხბურთელი თამაშობდა და ახლაც თამაშობს, მათ შორის გიორგი ჩაკვეტაძე („ჰამბურგი“) და გიორგი გიორბელიძე („დინამო დრეზდენი“), რომლებიც მეორე ბუნდესლიგაში გამოდიან.
მოგეხსენებათ „პრაიმ სპორტი“ საზოგადოებისთვის ნაკლებად ცნობილ ქართველ ფეხბურთელებზე ხშირად გიამბობთ, ამჯერად კი „ობერნოილანდ ბრემენის“ 17-წლამდე გუნდის მოთამაშეს, ილია ხუსკივაძეს გაგაცნობთ.
ილია გერმანიაში დაიბადა და გაიზარდა, თუმცა ქართული ენა კარგად იცის და საქართველოს საფეხბურთო ისტორიასაც მეტ-ნაკლებად კარგად იცნობს. ახალგაზრდა ფეხბურთელს საქართველოს ნაკრებში თამაშის დიდი სურვილი აქვს და იმედოვნებს, რომ ოცნება ადრე თუ გვიან აუსრულდება.
„პრაიმ სპორტის“ მკითხველს ილია ხუსკივაძის ინტერვიუს შევთავაზებთ. ფეხბურთელმა ჩვენთან თავის ამჟამინდელ მდგომარეობაზე, გერმანულ ფეხბურთზე და მიზნებზე ისაუბრა:
– რა ასაკიდან დაიწყე ფეხბურთის თამაში და რომელი იყო თქვენი პირველი გუნდი?
– ხუთი წლის ვიყავი, ჩემი პირველი კლუბი კი „ბრემენ უოლე“ გახლდათ, იქ 6 წელი ვითამაშე, სადაც ძალიან წარმატებული და შესანიშნავი დრო გავატარე, მეც ძალიან გავხალისდი. ახლა 16 წლის ვარ და ბრემენში ვცხოვრობ. გასული წლის ზაფხულიდან „ობერნოილანდ ბრემენში“ ვთამაშობ. სეზონის პირველმა ნახევარმა არ ჩაიარა ისე, როგორც მოველოდი, რადგან ბევრი ტრავმა მივიღე… წლის მეორე ნახევარში ყველაფერს გავაკეთებ ჩემი წინსვლისთვის.
– რატომ აირჩიე ფეხბურთი და არა სხვა სპორტის სახეობა?
– ფეხბურთი მაიძულებს ყველა პრობლემა და სირთულეები დავივიწყო. ეს სპორტი უდიდეს სიამოვნებას მანიჭებს.
– როგორ დაახასიათებ გერმანული ფეხბურთის სტილს?
– სწრაფი და ინტენსიურია, რაც ძლიერი ფიზიკური მომზადების საფუძველზეა დამყარებული.
– შენს პოზიციაზე საუკეთესოდ, რომელ ფეხბურთელებს მიიჩნევ?
– ნეიმარს, სენტ-მაქსიმინს და ვინისიუს ჯუნიორს. მათი თამაშის ორიგინალური სტილი ძალიან მომწონს.
– ქართულ ფეხბურთს თუ ადევნებ თვალს და საუკეთესოდ ვის მიიჩნევ?
– სამწუხაროდ, ქართული ფეხბურთის შესახებ ბევრი არაფერი ვიცი, მაგრამ ეროვნული ნაკრების თამაშებს ზოგჯერ ვუყურებ. საუკეთესო ქართველი ფეხბურთელი ჩემი აზრით, შოთა არველაძეა.
– საქართველოს ეროვნულ ნაკრებში თამაშის სურვილი თუ გაქვს?
– სურვილი ძალიან დიდია. ვნახოთ ჩემი ცხოვრება და საფეხბურთო კარიერა როგორ განვითარდება. ამ მიზნის მისაღწევად ყველაფერს გავაკეთებ და ბევრს ვიშრომებ. საქართველოს ეროვნულ ნაკრებში გამოძახების შემთხვევაში დიდი სურვილი იქნება, რომ გუნდმა გაიმარჯვოს და წარმატებებს მიაღწიოს.
– გერმანიაში ერთ დროს ბევრი ქართველი ფეხბურთელი თამაშობდა, რა გსმენია მათ შესახებ?
– ბევრი არაფერი, მაგრამ როცა რამეს ვიგებ, ძალიან დაინტერესებული ვარ. ლევან კობიაშვილის გოლი მაქვს ნანახი ოლივერ კანის კარში. საუცხოო დარტყმული იყო, კობიაშვილს ძალიან კარგი მიზანი ჰქონდა, ეს გოლი სასიამოვნო საყურებელია.
– ჰამბურგში ქართველი ფეხბურთელი, გიორგი ჩაკვეტაძე თამაშობს, თუ ადევნებ მის თამაშებს თვალს?
– ამ დრომდე მისგან ბევრი არაფერი მსმენია, მხოლოდ რამდენიმე მომენტი მაქვს ნანახი. აუცილებლად დავიწყებ გიორგის თამაშის ყურებას და ვნახავ, თამაშის როგორი სტილი ახასიათებს.
– საქართველოს როგორ დაახასიათებ?
– ძალიან ლამაზი ქვეყანაა თავისი რელიეფით, კულტურით… ბევრი კარგი ხალხი ცხოვრობს და ყოველთვის სასიამოვნოა იქ ყოფნა.
– რა როლი მიუძღვის მამათქვენს თქვენი საფეხბურთო კარიერის განვითარებაში?
– ძალიან მეხმარება და დიდი მოტივატორია. მამაჩემი მე და ჩემს ძმას ქართული ფეხბურთის შესახებ პერიოდულად გვიყვება.
– რა მიზნები გაქვს ამ სეზონში?
– რაც შეიძლება, ბევრი გოლის გატანა და გუნდთან ერთად ბრემენის ფეხბურთის ასოციაციის ჩემპიონობა, რაც ავტომატურად რეგიონალურ ლიგაში გადასვლას ნიშნავს. გუნდი, რომელშიც ვთამაშობ, წარმატებაზე ორიენტირებულია და ვფიქრობ, რომ დასახულ მიზანს მივაღწევთ. კლუბი ცდილობს, რაც შეიძლება მეტი ტალანტი მოიზიდოს და პროფესიონალ ფეხბურთელებად ჩამოყალიბოს.
– რა არის შენი ოცნება?
– მსურს, წარმატებული ფეხბურთელი გავხდე და რომელიმე ქვეყნის – გერმანიის, საქართველოს ან უკრაინის ეროვნულ ნაკრებში ვითამაშო, რადგან სამივე ქვეყანა ჩემთან, როგორც სამშობლო ისე ასოცირდება.
