ტოკიოს ზაფხულის ოლიმპიური თამაშები კორონავირუსის პანდემიის გამო რომ რადიკალურად განსხვავებული იქნება და არაერთი რეგულაცია იქნა შემოშავებული ყველას კარგად მოეხსენება. სპორტის მოყვარულთ ალბათ ისიც ეცოდინებათ, რომ იაპონიის დედაქალაქში გასამართი ოლიმპიადა გამორჩეული იმითაც იქნება, რომ რუსეთის გუნდი ვერ იასპარეზებს. მსოფლიო ანტიდოპინგურმა სააგენტომ (WADA) და სოკ-მა რუსეთი ოლიმპიადიდან მოკვეთა.
უფრო სწორად, „სუფთა“ რუსი სპორტსმენები, რომლებსაც არაფერი უცუღლუტიათ ტოკიოში კი ჩავლენ, მაგრამ ისინი არა საკუთარი ქვეყნის სახელით, არამედ საერთაშორისო ოლიმპიური კომიტეტის დროშის ქვეშ იასპარეზებენ.
ეს სასჯელი რომ სამართლიანია კიდევ ერთხელ დამტკიცდა, როდესაც WADA-მ ამას წინათ 2018 წლის ოფიციალური მოხსენება გამოაქვეყნა, რომელშიც რუსეთი პირველ ადგილზეა.
დოკუმენტის მიხედვით, მსოფლიო ანტიდოპინგურმა სააგენტომ 263 519 სინჯი აიღო და ყველაზე ურჩები რუსები გამოდგნენ. ჯამში დოპინგზე 144 ათლეტი ჩავარდა, რომელთაგან უმეტესობა მძლეოსანი და ძალოსანი იყო.
საერთო ჯამში, მთელი მსოფლიო მასშტაბით აკრძალული პრეპარატები 1923 სპორტსმენმა მიიღო. ოლიმპიური სახეობებიდან, ყველაზე მეტი დარღვევა ველოსპორტში დაფიქსირდა, შემდეგ კი მძლეოსნობა და ძალოსნობა მოდიან.
