დინამომ ამოყვინთა – პირველი გამარჯვება ჩემპიონთა ლიგაზე

ქართული კლუბი ჩემპიონთა ლიგის ჯგუფურ ეტაპზე რომ თამაშობს, გუნდის სწორ და გამართულ მენეჯმენტზე, საქმისადმი პროფესიონალურ მიდგომაზე მიუთითებს.

წყალბურთზე და თბილისის „დინამოზე“ მოგახსენებთ, რომელიც უკვე ზედიზედ მეორე წელია ევროპის ყველაზე პრესტიჟულ ტურნირში თამაშობს და ღირსეულადაც გამოიყურება. რა თქმა უნდა, რეალისტები ვართ და ზუსტად ვიცით, რომ დიდ მონსტრებთან ჯერ წარმატებაზე ფიქრი ნაადრევია, მაგრამ ბიჭები გამოცდილებას კი იძენენ.

ჩემპიონთა ლიგის B ჯგუფის მატჩები, რომელშიც „დინამო“ თამაშობს ბუდაპეშტში იმართება. საწყისი ორი ტურში ქართულმა კლუბმა იტალიური და ესპანური გრანდებისგან მარცხი იწვნია და ეს მოსალოდნელიც იყო. შეიძლება ითქვას, რომ ზუკა რურუას შეგირდებს, მთავარი დაპირისპირება მესამე ტურში მონტენეგროულ „იადრანთან“ ელოდათ. ფავორიტი ამ შემთხვევაშიც მონტენეგროელები იყვნენ. ჯერ მარტო მათი ისტორიული წარსულის გახსენება რად ღირს. ვინც არ იცით, გეტყვით, რომ „იადრანი“ ოთხმოცდაათიან წლებში ჩემპიონთა ლიგის ორგზის ჩემპიონია და ევროპულ ასპარეზზე შემდეგაც არაერთი წარმატებისთის მიუღწევიათ.

მოკლედ, „დინამო“ წყვილში აუტსაიდერად მოჩანდა, მაგრამ მატჩის ბოლოს ტაბლოზე სხვა ანგარიში კიაფობდა. ქართულმა კლუბმა მრისხანე მეტოქე 11:8 დაამარცხა და უმნიშვნელოვანესი გამარჯვება მოიპოვა.

ამ გამარჯვებით, „დინამომ“ 3 ქულა აიღო, სატურნირო ცხრილში ზემოთ აინაცვლა და მეხუთე ადგილზე დამკვიდრდა. 6 გუნდიანი ჯგუფიდან, პლეიოფში პირველი ოთხეული გადის. ასე რომ შანსი ბოლომდე დაკარგული არ არის.

წყალბურთში, ჩემპიონთა ლიგაზე მარტამდე შესვენება გამოცხადდა და ჩვენ წყალბურთელებსაც გაზაფხულიდან მორიგი ბატალიები ელით.