16-18 აპრილს, ლისაბონი ძიუდოში ევროპის ჩემპიონატს მასპინძლობს, რომელშიც ბუნებრივია საქართველოს ნაკრებიც მონაწილეობს.
პირველი საშეჯიბრო დღე ლაშა გუჯეჯიანის შეგირდებისთვის უმედლოდ არ დასრულდება. საკითხავი ის არის, აჟღერდება თუ არა ეროვნული ჰიმნი, ამის შანსი კი ვაჟა მარგველაშვილს აქვს.
პორტუგალიის დედაქალაქში გაშლილ ტატამზე, დღეს ვაჟთაგან ორი ქართველი კიმონოისტი გავიდა. სამწუხაროდ, თემურ ნოზაძისთვის (60კგ) ტურნირი მალევე დასრულდა. მან სტარტზევე ისრაელის წარმომადგენელ მატან კოკოლაევთან დამარცხდა და ისე მოხდა, რომ ვერც რეპეშაჟში გადაინაცვლა.
სამაგიეროდ იყოჩაღა ვაჟა მარგველაშილმა (66კგ). ჩვენებური ძიუდოისტი ფინალამდე ერთი ამოსუნთქვით მივიდა. მან ესპანელ, ბელარუს და სერბ მეტოქეებს აჯობა და ოქროს მედლისთვის ბრძოლაში იტალიელ მანუელ ლომბარდოს დაეჭიდება.
