არიან ჩოგბურთელები, რომლებიც წყვილის მოთამაშეებად ითვლებიან და სწორედ ამ თანრიგში არიან გამორჩეულები. ამერიკელი ძმები ბრაიანების მაგალითიც ალბათ საკმარისი უნდა იყოს.
რაც შეეხება ნიკოლოზ ბასილაშვილს, ის წყვილთა თანრიგში ძლიერი არასდროს ყოფილა, თუმცა ეს იმას არ ნიშნავს, რომ მხოლოდ ერთეულებში თამაშობს. ქართველ ჩოგბურთელს ამა თუ იმ ტურნირზე და ბუნებრივია უპირველესად დიდ სლემებზე წყვილებში მონაწილეობა მიუღია, თუმცა როგორც ავღნიშნეთ, მხოლოდ ცნობილი ოლიმპიური დევიზით – მთავარია მონაწილეობა და არა შედეგი.
ავსტრალიის ღია პირველობაზე ერთეულთა თანრიგში პირველ წრეში მარცხის შემდეგ, ბასილაშვილი წყვილებში გადაერთო და იქაც ტურნირს სასტარტო ეტაპზე გამოეთიშა. ჩვენებურის მეწყვილე კორტზე გერმანელი ანდრე ბეგემანია გახლდათ, წილისწყრამ კი მათ მეიჯორის უმთავრესი ფავორიტები – რობერტ ფარას და ხუან-სებასტიან კაბალის დუეტი არგუნა.
კოლუმბიელი ჩოგბურთელები ავსტრალიის ღია პირველობაზე პირველ ნომრად არიან განთესილები. მათ არაერთ ტურნირზე უმარჯვიათ და კორტზე ერთმანეთს უსიტყვოდ უგებენ.
მოკლედ, ნიკოლოზ ბასილაშვილი და ანდრე ბეგერმანი, ფარა-კაბალის წყვილთან სამ სეტიან ბრძოლაში -7:6, 6:7, 6:4 დამარცხდა. დიდი ალბათობით კოლიმბიური წყვილი მინიმუმ ფინალში მაინც გააღწევს.
