წლის მეორე დიდი სლემის ტურნირამდე ზუსტად ორი კვირაა დარჩენილი. 2021 წლის როლან გაროსი სტარტს 30 მაისს აიღებს.
მანამდე კი ATP-ის კალენდარში არაერთი პრესტიჟული ტურნირია ჩანიშნული, სადაც ტოპ ჩოგბურთელები მიიღებენ მონაწილეობას.
მომდევნო კვირაში ჟენევასა და ლიონში მეტად მაღალი დონის შეჯიბრებები გაიმართება, რომელთა საპრიზო ფონდიც თითქმის ნახევარი მილიონი ევროა. ქართველ გულშემატკივარს უპირველესად ბუნებრივია ნიკოლოზ ბასილაშვილი აინტერესებს, თუმცა მას ვერც შვეიცარიაში ვიხილავთ და ვერც საფრანგეთში. ქართველმა ჩოგბურთელმა მადრიდის და რომის მასტერსების შემდეგ დასვენება გადაწყვიტა.
საგულისხმოა, რომ ლიონის ტურნირის წინა გათამაშებაში ბასილაშვილი ნახევარფინალამდე გავიდა და იქ ფელიქს ოჟე-ალიასიმთან დამარცხდა. იყო მოლოდინი, რომ ნიკა ლიონში წლეულსაც ჩავიდოდა, თუმცა ვარაუდი არ გამართლდა.
ჟენევის და ლიონის ტურნირების შემდეგ, ბელგრადსა და პარმაში კიდევ ორი პრესტიჟული საჩოგბურთო შეჯიბრია ჩანიშნული და შესაძლოა როლან გაროსამდე ბოლო რეპეტიციად ნიკოლოზ ბასილაშვილს სწორედ რომელიმე მათგანი აქვს შერჩეული.
