საქართველოს ნაკრების ვეტერანმა ფეხბურთელმა, აჩი არველაძემ „რუსთავი 2“-ის ეთერში, გადაცემა სპორტის საათში სტუმრობისას ქართველი გულშემატკივრების როლს კიდევ ერთხელ გაუსვა ხაზი და განაცხადა, რომ ჩრდ. მაკედონიასთან თამაშზე მაყურებლის დასწრება ფეხბურთელებს დამატებით მუხტს მისცემდა.
„კიდევ ერთხელ გამოჩნდა თუ რამხელა ძალა აქვს სტადიონზე გულშემატკივარს, ნეტა მაკედონიასთანაც ყოფილიყვნენ. სასწაული მუხტი აქვს დინამოს სტადიონს. შემართება არ არსებობს გულშემატკივრების გარეშე. ამაზე საუბარი შორს წაგვიყვანს, მაგრამ აქამდე რაზეც მწყდებოდა გული სწორედ ეს იყო. ესპანეთთან თამაშის დროს ასმაგად დავრწმუნდი, რომ წარმოუდგენელი იყო ის თამაში მაყურებლის გარეშე. ყველაზე მნიშვნელოვანი თამაში გამოვტოვეთ. თუ გუშინ წინ შეიძლებოდა, ალბათ მაშინაც იქნებოდა შესაძლებელი უფრო მეტი ყურადღებით“, – განაცხადა აჩი არველაძემ.
შეგახსენებთ, რომ 2022 წლის მსოფლიო ჩემპიონატის შესარჩევი ეტაპის მეორე მატჩში საქართველოს ნაკრები ესპანეთთან „დინამო არენაზე“ 1:2 დამარცხდა. შეხვედრას 16 ათასამდე გულშემატკივარი დაესწრო, რაც სტადიონის ტევადობის 30%-ს შეადგენს.
