დოჰაში ტრიუმფის შემდეგ, ნიკოლოზ ბასილაშვილი ისევ წაგებების სერიაზე გადავიდა. ქართველი ჩოგბურთელი ზედიზედ მეორე ტურნირს სასტარტო მატჩში ეთიშება. ჯერ იყო და დოჰაში ჩემპიონობიდან მალევე, დუბაის 500-იანი კატეგორიის შეჯიბრში გადაერთო და პირველ წრეში ტეილორ ფრიცთან წააგო, ხოლო ახლა მაიამის მასტერსს საწყის ეტაპზე გამოეთიშა.
ნიკოლოზ ბასილაშვილი მაიამიში პირველ წრეში ისვენებდა და მეტოქის მოლოდინში იყო. ეს უფლება მიქაელ იმერმა მოიპოვა, რომელმაც საწყის მატჩში ჩილელი მოქინააღმდეგე დაამარცხა.
შვედი მეჩოგნე რეიტინგის 95-ე ნომერია, თუმცა ეს იმას არ ნიშნავდა, რომ ბასილაშვილს იოლი გასეირნება ელოდა. 22 წლის იმერი საკმაოდ პერსპექტიული ჩოგბურთელია, მაგრამ წყვილის ფავორიტად მაინც ჩვენებური მიიჩნეოდა.
მატჩი დაძაბული გამოდგა და საბოლოოდ მიქაელ იმერის გამარჯვებით – 6:3, 4:6, 6:4 დასრულდა. ნიკოლოზ ბასილაშვილს კი ევროპაში დაბრუნება და გრუნტის ტურნირებისთვის მზადება მოუწევს.
