გასული საუკუნის 70-იან წლებში იყო ასეთი კალათბურთელი ჩარლზ ტომასი, რომელიც „ბარსელონას“ ღირსებას იცავდა.
ცუდი კალათბურთელი იყოო ვერ იტყვი, მაგრამ კარიერის დასრულების შემდეგ ცხოვრება აეწეწა და ნარკოტიკების მოხმარებას მიჰყო ხელი და ოჯახი დაენგრა. ცოლმა ასეთ მდგომარეობაში ჩავარდნილ ტომასთან თანაცხოვრება აღარ ისურვა.
ოთხმოციან წლებში პრესაში ტომასის გარდაცვალების შესახებ გაცხადდა. ვერსიები სხვადასხვაგვარი იყო. ზოგი ამბობდა, რომ ის ბანდიტურ დაჯგუფებებს ემსხვერპლა, ზოგი კი ნარკოტიკებმა შეიწირაო.
სიმართლე კი სულ სხვა აღმოჩნდა. ჩარლზ ტომასი საერთოდ ცოცხალია და ამის შესახებ 40 წლის შემდეგ გახდა ცნობილი. ეს შოკისმომგვრელი ამბავი კი ტომასის ყოფილმა თანაგუნდელმა ნორმან კარმაიკლმა გააცხადა. მისი თქმით ტომასი ტექსასის შტატის ქალაქ ამარილოში მდებარე ერთ-ერთ მოხუცთა თავშესაფარში იმყოფება.
კარმაიკლის თქმით, რამდენიმე დღის წინ, მას უცნობმა ქალბატონმა დაურეკა და უთხრა, რომ ჩარლზ ტომასს მასთან საუბარი სურდა.
„გონს ახლაც ვერ მოვსულვარ. მისი ხმა რომ გავიგე გაოცებისგან ენა ჩამივარდა. თავიდან მაინც არ ვიჯერებდი, რომ ტომასი იყო, მაგრამ შემდეგ დავრწმუნდი. მას უბრალოდ ჩემთან ლაპარაკი სურდა“ – ამბობს ნორმან კარმაიკლი.
