ხვალ, რაგბი ევროპის ჩემპიონატის მესამე ტურში საქართველოს ნაკრები სტუმრად რუს დათვებს შეერკინება. დღეს ბორჯღალოსნებმა კაპიტნის ვარჯიში გამართეს, რომლის დასრულების შემდეგაც გუნდის მთავარმა მწვრთნელმა ლევან მაისაშვილმა და კაპიტანმა, მერაბ შარიქაძემ ჟურნალისტებთან მცირე კომენტარი გააკეთეს.
„ახალგაზრდა გუნდი გვყავს, მაგრამ გუნდი არის შეთამაშებული. ეს მიმდინარე პროცესია ჩვენთვის. რაგბი ევროპის ჩემპიონატზე იმის გარდა, რომ ვგეგმავთ მოგებას, საკვალიფიკაციო წელიც არის და ვცდილობთ ახალგაზრდა მოთამაშეებიც გამოვცადოთ“, – განაცხადა ლევან მაისაშვილმა.
„ბოლო თამაშში ვერ დავდეთ ისეთი შედეგი, როგორიც გვინდოდა, მაგრამ გავიმაჯრვეთ. ვერ ვიტყვი იმას, რომ რუსებთან მოგება მარტივია, ასე არასდროს ყოფილა, ყოველთვის დიდი ძალისხმევა გვჭირდებოდა. რაც შეეხება ბოლო თამაშს, ძალიან ბევრჯერ დავჯარიმდით და თამაშის კონკრეტულ მონაკვეთებში საკმარისი დომინირება ვერ შევძელით. დარწმუნებული ვარ, რომ ამის გამოსწორება ხვალ შესაძლებელი იქნება.
გუნდში საოცარი ატმოსფეროა, ახალი ბიჭები ძალიან კარგად ინტეგრირდნენ გუნდში და კომფორტულად გრძნობენ თავს. თავისთავად, შეცდომების დაშვებისგან როგორც მე, ისე ნებისმიერი მოთამაშე დაზღვეული არაა. ამის გამო მათ საყვედურს არავინ აძლევს, პირიქით. ამ ბიჭებს ყველანაირი პირობა აქვთ, რომ გაიზარდნონ. რაც შეეხება მათ თამაშს, მგონია რომ ახლაც კარგად თამაშობენ, თუმცა გარკვეული გამოცდილების აღება სჭირდებათ და რამდენიმე წელში ბევრად უკეთესად ითამაშებენ“, – განაცხადა მერაბ შარიქაძემ.
