ახლო წარსულში გამოჩენილი იტალიელი ფეხბურთელი დანიელე დე როსი იტალიის ნაკრებში ბრუნდება, ოღონდ ამჯერად უკვე სამწვრთნელო შტაბში.
გეცოდინებათ, რომ დე როსიმ კარიერის უდიდესი ნაწილი „რომაში“ გაატარა, ბოლოს კი მცირე ხნით არგენტინულ „ბოკა ხუნიორში“ თამაშობდა. მისი მთავარი მიღწევა კი 2006 წლის მუნდიალზე ტრიუმფია, რომელიც იტალიის ნაკრებთან ერთად გერმანიის მსოფლიო ჩემპიონატზე მოიგო.
ამიერიდან კი დანიელე დე როსი რობერტო მატჩინის იტალიის ნაკრებში დაეხმარება. ის მანჩინის ერთ-ერთი ასისტენტი გახდა.
„დე როსის იტალიის ნაკრებისთვის ბევრი აქვს გაკეთებული. ახლა მას ამის შანსი კვლავ მიეცემა, ოღონდ უკვე სხვა სტატუსით. დე როსი ჩვენი ნაკრების სამწვრთნელო შტაბში ჩაეწერა, რათა დაიწყოს ახალი დიდებული თავგადასავალი, როგორიც მას ფეხბურთელობის პერიოდში ჰქონდა“ – ნათქვამია იტალიის ფეხბურთის ფედერაციის ოფიციალურ განცხადებაში.
