საქართველოს რაგბის კავშირის ახალმა პრეზიდენტმა სოსო ტყემალაძემ რადიო „Georgian Times“-ში სტუმრობისას განაცხადა, რომ რაგბის კავშირის პრეზიდენტობის ყოფილმა კანდიდატმა, ბაჩო ხურციძემ მას თანადგომა გამოუცხადა და სამომავლოდ თანამშრომლობაც შესთავაზა.
„მე სამივე კანდიდატს ვიცნობ. მივსულიყავი და მეთქვა აი მე ვაპირებ სიტუაციის განტვირთვას და ირაკლი, ან ბაჩო აღარ დააყენოთ კანდიდატურა, ან დამიჭირეთ მხარითქო?! ამ ადამიანებთან ვახლობლობ, კარგი ურთიერთობა მაქვს, წლები ვეხმარებოდი და რას იფიქრებდნენ, ამას თავის თავისთავისთვის უნდა პრეზიდენტობაო. გამოვედი და საჯაროდ ვთქვი. ვინც გამომეხმაურა იყო ბაჩო ხურციძე. დამირეკა და მითხრა – „მე საკუთარი თავი პრეზიდენტად მხოლოდ იმის გამო მინდოდა, რომ ეს პრობლემები დამთავრებულიყო, არ არის ჩემთვის პანაცეა, რომ მაინცდამაინც მე უნდა ვიყო პრეზიდენტიო. ყველანაირად მივესალმები შენს კანდიდატურას და თუ დაგჭირდები, გვერდში დგომისთვის მზად ვარო“. ბაჩოს კარგი განათლება აქვს, თავდადებულია, უზრუნველყოფილია თავისი შემოსავლებით და რაგბით ცხოვრობს. ბოლო პერიოდში ისეთი თანადგომა გამომიცხადა, ვეუბნებოდი ოჯახი არ გყავს და სხვა ცხოვრება არ გაქვსთქო? კი მყავსო, მაგრამ რაგბიც ჩემი ოჯახია და ძალიან მიყვარსო. გოჩა სვანიძემ როგორც მახსოვს ერთ-ერთი ტელევიზიის ეთერში თქვა, რომ კანდიდატურის დაყენებას აღარ აპირებდა. ირაკლის დაველოდე, მაგრამ გამოხმაურება არ იყო. შემდეგ ვიფიქრე, რომ არჩევნებზე შემოვიდოდა და გარემოს კონსტრუქციულ რეჟიმში წავიყვანდით. შემდეგ დააანონსა, რომ ბოიკოტს უცხადებდა და თუ ბოიკოტს უცხადებ, რატომ გინდა მაშინ საარჩევნო პროცესის ჩაშლა?“ – განაცხადა სოსო ტყემალაძემ.
მისივე თქმით, თუ სასამართლო ირაკლი აბუსერიძის სარჩელს დააკმაყოფილებს, მაშინ ის სასამართლო გადაწყვეტილებას დაემორჩილება და რაგბის კავშირის პრეზიდენტის თანამდებობას მშვიდობიანად დატოვებს.
შეგახსენებთ, რომ რაგბის კავშირის საპრეზიდენტო არჩევნებზე, რომელიც 10 მარტს ჩატარდა გამარჯვება იოსებ ტყემალაძემ მოიპოვა. მან დელეგატების მხრიდან 43 ხმა მიიღო და ქართულ რაგბის მომდევნო 4 წლის განმავლობაში უხელმძღვანელებს.
პარალელურ რეჟიმში, ბოიკოტის რეჟიმში რჩება ირაკლი აბუსერიძის გუნდი, რომელიც არჩევნებს არალეგიტიმურად მიიჩნევს და საკუთრი სიმართლის დამტკიცებას ახლა სასამართლოს გზით ცდილობს.
ცნობისთვის, 30 დეკემბერს სარაგბო კლუბ „ლოკომოტივის“ ბაზაზე გამართულ საარჩევნო ყრილობაზე გამარჯვება ირაკლი აბუსერიძემ მოიპოვა. 1 კვირაში საჯარო რეესტრმა ვეტერან მორაგბეს პრეზიდენტად რეგისტრაცია შეუჩერა, მიზეზად კი წესდების შეუსაბამოდ ჩატარებული არჩევნები დაასახელა.
