ნიკოლოზ ბასილაშვილს ისევ გაუმართლა, მაგრამ საკითხავი ის არის, რამდენად შეირგებს წილისყრის ამ საჩუქარს.
როტერდამის უპრესტიჟულე ტურნირზე მოგახსენებთ, რომელიც სტარტს 1 მარტს იღებს და იქ სხვებთან ერთად ჩვენებური მეჩოგნეც იასპარეზებს.
ისევ გამართლებაში კი ჯერ კიდევ მიმდინარე მონპელიეს საჩოგბურთო შეჯიბრს ვგულისხმობთ, სადაც ბასილაშვილს წილისყრით საკვალიფიკაციო ეტაპიდან გადმოსული, რეიტინგის 113-ე ნომერი გრეგუარ ბარერე ერგო, მაგრამ ორ სეტში დაეჩაგვრინა.
როტერდამშიც ნიკას სასტარტო მეტოქე საკვალიფიკაციო ტურნირის ოთხი გამარჯვებული ჩოგბურთელიდან ერთ-ერთი იქნება, რომელიც ნებისმიერ შემთხვევაში ქართველ ჩოგბურთელზე დაბლა მდგომი იქნება. ისე, სჯობს სიმართლეს თვალებში შევხედოთ და ვაღიაროთ, რომ კაცმა არ იცის ბასილაშვილს უფრო გაუმართლა თუ ამ ეტაპზე ჯერ კიდევ იმ უცნობ ჩოგბურთელს, რადგან ქართველი მეჩოგნე აგერ უკვე წელიწადზე მეტია საშინელ რეგრესს განიცდი და ვისაც არ ეზარება ყველა უგებს.
შარშან, ნიკოლოზ ბასილაშვილმა როტერდამში სასტარტო ეტაპზევე რუს ანდრეი რუბლევთან წააგო, ტურნირის გამარჯვებული კი, რომლის საპრიზო ფონდიც 1,117,900 მილიონი ევროა ფრანგი გაელ მონფისი გახდა.
ტურნიზე პირველ ნომრად დანილ მედვედევია განთესილი, მეორე კი სტეფანოს ციციპასი. როტერდამში ასევე ითამაშებენ ალექსანდრე ზვერევი, სტენ ვავრინკა, დავიდ გოფინი და სხვა სახელოვანი ჩოგბურთელები.
პირველი წრის გადალახვის შემთხვევაში ქართველი ჩოგბურთელის მეტოქე სტენ ვავრინკასა და კარენ ხაჩანოვს შორის გამარჯვებული იქნება.
იმედი ვიქონიოთ, რომ როტერდამში მთლად ძველს თუ არა, სხვა ბასილაშვილს მაინც ვიხილავთ.
