ტომას ტუხელმა „ჩელსიში“ მოსვლის შემდეგ ალბათ ყველაზე მნიშვნელოვანი გამარჯვება მოიპოვა. პრემიერლიგა და იქ წარმატებით თამაში თავისთავად მნიშვნელოვანია, მაგრამ სულ სხვა განზომილებაა ჩემპიონთა ლიგა. ევროპის ყველაზე პრესტიჟულ საკლუბო ტურნირზე ღირსეულად ასპარეზობა ამა თუ იმ გუნდის გულშემატკივარს სხვანაირად აბედნიერებს.’
„არისტოკრატებიც“ ადგნენ და ტუხელის თავკაცობით მადრიდის „ატლეტიკოს“ გასვლაზე 1:0 აჯობეს. რა თქმა უნდა, დამთავრებული ჯერ არაფერია, რადგან მინიმალური ანგარიშით გამარჯვება, თუნდაც მეტოქის მოედანზე არაფრის გარანტიას არ იძლევა.
ტომას ტუხელიც განმეორებით დაპირისპირებას დიდი სიფრთხილით ელის.
„კარის მშრალად შენახვა ჩვენი ერთ-ერთი უპირველესი ამოცანა იყო. მოხარული ვარ, რომ დასახულ მიზანს მივაღწიეთ, რაც თავდაუზოგავმა შრომამ, დიდმა გუნდურმა ძალისხმევამ და დისციპლინირებულმა თამაშმა განაპირობა.
ოლივიე ჟირუს გოლით მოხიბლული დავრჩი. მას მართლაც ფანტასტიკური დარტყმა გამოუვიდა და ძლიერ მეტოქესთან დამსახურებული გამარჯვება მოგვაპოვებინა.
ატლეტიკოს დაცვაში თამაში კარგად გამოსდის. კარგია, რომ მათი დაცვითი ეშელონების გარღვევა მოვახერხეთ და არც კონტრშეტევაში თამამად გადმოსვლის უფლება მივეცით.
გამარჯვებით ბედნიერი ვარ, მაგრამ სიფრთხილე გვმართებს. ჯერ ზეიმი ნაადრევია“ – აღნიშნა ტომას ტუხელმა.
