ახლახანს, თელ-ავივში დასრულებული გრან-პრის გათამაშება ძიუდოში საქართველოსთვის მართლაც განსაკუთრებული გამოდგა. გარდა იმისა, რომ ისრაელში გაშლილ ტატამზე ქართველმა ძიუდოისტებმა რეკორდული რაოდენობის მედლები (7) მოიპოვეს, აღნიშნული გრან-პრი ჩვენთვის სხვამხრივაც გამოირჩა.
კერძოდ, ეთერ ლიპარტელიანმა, რომელმაც ბრინჯაოს მედალი დაისაკუთრა, ოლიმპიური თამაშების ლიცენზიაც მოიპოვა. ეს კი იმას ნიშნავს, რომ ის გახდა პირველი ქართველი ძიუდოისტი ქალი, რომელიც ოთხწლეულის ყველაზე გრანდიოზულ სპორტულ ფორუმზე იასპარეზებს.
ეთერ ლიპარტელიანს, თელ-ავივში ნაჩვენები შედეგით 500 სარეიტინგო ქულა დაემატა, ჯამში 2402 დაუგროვდა, 7 საფეხურით წინ წაიწია და 21-წ ადგილზე დასკუპდა. ამით მან ლიცენზია გაინაღდა.
შეგახსენებთ, 2016 წლის რიოს ოლიმპიადაზე საქართველოს სახელით ნიდერლანდემა ძიუდოისტმა ქალმა ესტერ სტამმა იასპარეზა.
