საქართველოს მორაგბეთა ნაკრებმა რუსეთის ნაკრები ზედიზედ 19-ედ დაამარცხა. დღევანდელი მატჩი, რომელიც მიხეილ მესხის სახელობის სტადიონზე ჩატარდა, ბორჯღალოსნების გამარჯვებით, 16:7 დასრულდა.
მატჩის შემდეგ, საქართველოს ნაკრების კაპიტანმა, მერაბ შარიქაძემ ჟურნალისტების კითხვებს უპასუხა და რუსეთთან მატჩი შეაფასა.
„დარწმუნებული ვარ გულშემატკივარი ბედნიერი არ იქნება ამ თამაშით და თავისთავად, ჩვენც არ ვართ დიდად გახარებულები, მაგრამ მოგება მოგებაა. რუსეთთან თამაში ძალიან ემოციური და მძიმეა ჩვენთვის, ამასთან, იმხელა პასუხისმგებლობას ვგრძნობთ, რომ ხშირად ხელს გვიშლის და იგივე მოხდა ახლაც. ამ თამაშში ჩვენი ყველაზე დიდი მინუსი ის იყო, რომ ძალიან ბევრჯერ დავჯარიმდით. ამ დიდ ემოციებს მოყვება ასეთი ჯარიმები, რაც რუსეთთან ხშირად არის პრობლემა. ბიჭები ლაპარაკობდნენ გასახდელში, რომ ინგლისთან არ გვინერვიულია მაგის ნახევარი, რასაც ახლა ვნერვიულობდითო. მესმის, რომ გულშემატკივარს არ უნდა ამის გათვალისწინება, მაგრამ მაინც უნდა გაითვალისწინონ. დიდი ხანია ნაკრებში ვარ და ამ დრომდე, რუსეთთან თამაში ძალიან დიდი წნეხი და პასუხისმგებლობაა ჩემთვის. თუმცა, ამის მიუხედავად, მაინც მოვახერხეთ გამარჯვება და კიდევ ერთი მოგება ჩავიწერეთ ისტორიაში“, – განაცხადა მერაბ შარიქაძემ.
სრული კომენტარის სანახავად იხილეთ ვიდეო:
