არაერთი ფაქტის გახსენება შეგვიძლია, როდესაც ესა თუ ის ფეხბურთელი რომელიმე გუნდის უპირობო ლიდერი ყოფილა, შემდეგ სხვა გრანდში წასულა და იქ თავი ვეღარ წარმოუჩენია. ერთ-ერთ ასეთ ფეხბურთელად ალბათ ედენ აზარიც უნდა მივიჩნიოთ.
ბელგიელი ვარსკვლავი წლების მანძილზე „ჩელსის“ სული და გული იყო, 2019 წელს კი „რეალში“ გადაბარგდა, სადაც მისი კარიერა დაღმა წავიდა. სამეფო კლუბმა აზარში 100 მილიონი ევრო გადაიხადა და მისი დიდად ეიმედებოდა, თუმცა ჯერჯერობით ბელგიელი „რეალში“ ისე ვერ ბრწყინავს, როგორც ამას „ჩელსისში“ აკეთებდა.
აზარმა წონაშიც საგრძნობად მოიმატა, თუმცა მეტი ობიექტურობისთვის უნდა ითქვას, რომ ბელგიელი „რეალში“ ტრავმებმაც გააწამა.
არ არის გამორიცხული ედენ აზარი არისტოკრატებში დაბრუნდეს. ყოველშემთხვევაში ლონდონელებს ამის დიდი სურვილი აქვთ. როგორც რამდენიმე პოპულარული ევროპული გამოცემა ამტკიცებს, „ჩელსი“ და რომან აბრამოვიჩი მზად არიან აზარი „რეალიდან“ 40-50 მილიონად გამოისყიდონ.
