ნეიმარის პარიზული მიჯნურობა

არც ისე დიდი ხნის წინ, ნეიმარი ნანობდა და ერთი სული ჰქონდა ბარსელონაში დაბრუნებულიყო. ბრაზილიელი სუპერვარსკვლავი მამამისსაც, რომელიც მისი მთავარი აგენტია გამოუტყდა, რომ კატალონიური გრანდი ენატრებოდა.

მაშინ ნეიმარის საგა თვეების მანძილზე გაიწელა და საბოლოოდ ის „პსჟ“-ში დარჩა. ახლა კი როგორც ჩანს მას პარიზული გრანდი ისე შეუყვარდა, რომ იქიდან წასვლაზე აღარც ფიქრობს. პირიქით – ნეიმარი „პსჟ“-სთან კონტრაქტს კიდევ 4 წლით აგრძელებს.

ამ ინფორმაციას რამდენიმე ბრაზილიური და ევროპული გამოცემა ავრცელებს. მათი მტკიცებით, ფეხბურთელს და კლუბს შორის რამდენიმე უმნიშვნელო დეტალია შესათანხმებელი და ხელშეკრულებაც მალე გაოფიციალურდებაო.

შეგახსენებთ, რომ ბრაზილიელი ფეხბურთელი პსჟ-ში 2017 წელს გადავიდა და კლუბმა მის სანაცვლოდ 222 მილიონი ევრო გადაიხადა. ნეიმარმა „პარი სენ-ჟერმენის“ მაისურით 101 შეხვედრა ჩაატარა და 83 გოლი შეაგდო. ის საფრანგეთის ჩემპიონი 3-ჯერ გახდა.