ალბათ ბევრმა არ იცის რომ საქართველოში საბრძოლო ხელოვნების კლუბი ფუნქციონირებს, რომელიც ჩვენი ქვეყნისთვის ნამდვილად კეთილ საქმეს აკეთებს. კლუბ „ალფაგრინში“ ნებისმერ მსურველს შეუძლია შეისწავლოს სხვადასხვა საბრძოლო ხელოვნება, მათ შორის კრივი, ტაილანდური კრივი, გრემპლინგი, შერეული ორთაბრძოლები, უშუსანდა, კიკბოქსინგი და ა.შ.
უბრალოდ ახლა ერთი განსხვავებაა. ვინაიდან, პანდემიისგან გამოწვეული რეგულაციების გამო ფიტნესკლუბები დახურულია, კლუბის ხელმძღვანელებს, მწვრთნელებსა და კლუბში შემავალ მებრძოლებს ვარჯიშების ჩატარება ღია ცის ქვეშ უწევთ. არ აქვს მნიშვნელობა ამინდს. თოვლშიც, წვიმაშიც და ქარშიც ალფაგრინის მწვრთნელები ნებისმიერ მსურველს უპრობლემოდ ამზადებენ.
უფრო დეტალურად „ალფაგრინის“ საქმიანობაზე და მთავარი მწვრთნელისგან, გიგი შალამბერიძისგან შევიტყობთ, რომელიც ამავდროულად კლუბის დირექტორიცაა. გიგი შალამბერიძე ალფაგრინის შესახებ ტელეკომპანია „ფორმულას“ ესაუბრა:
– ჩვენ ვართ ფიტნეს და საბრძოლო კლუბი, სადაც შევასწავლით კრივს, ტაილანდურ კრივს, გრემპლინგს, შერეულ ორთაბრძოლებს, უშუსანდას, კიკბოქსინგს და ვცდილობთ მაქსიმალურად მეტ შეჯიბრში მივიღოთ მონაწილეობა სპორტის სხვადასხვა სახეობებში. ჩვენთან ემზადებიან პროფესიონალები, მოყვარულებიც და ბავშვებიც. ხმამაღლა ვიტყვი, რომ ჩვენთან შეიძლება ნებისმიერი სოციალური დაუცველი მოხვდეს და ჩვენი მომსახურებით სრულიად უფასოდ ისარგებლოს. ამისთვის ცნობა უნდა წარადგინოს, იმიტომ კი არა რომ ჩვენ ხალხს არ ვენდობით, უბრალოდ წესი წესია. ვხედავთ, რომ ფინანსურად უჭირს ხალხს და ვეხმარებით. მინდა გითხრათ, რომ ჩვენთან მართლა „ასწორებს“, რადგან კარგი ხალხი ვიკრიბებით.
როგორც ზემოთ გითხარით, კორონავირუსის პანდემიამ „ალფაგრინს“ ბევრი პრობლემა შეუქმნა, თუმცა კლუბი თავის საქმიანობის გაგრძელებას შეძლებისდაგვარად მაინც ახერხებს:
– პანდემიის გამო მოგვიწია გარეთ გამოსვლა. გარე ვარჯიშები ისედაც გვქონდა, უბრალოდ კვირაში ერთხელ ვიკრიბებოდით, ახლა კი ყოველდღიურად, დღეში ორჯერ გვიწევს. ვარჯიშობთ ყოველთვის, წვიმაშიც ქარშიც და თოვლშიც. ცუდი ამინდის გამო ვარჯიშებს ვერ გადავდებთ. ახლაც როდესაც გელაპარაკებით გარეთ წვიმს, მაგრამ 12 საათზე ვარჯიში გვაქვს და რა ვქნათ. პანდემია ძალიან ცუდად შეგვეხო. 25-ში მივემგზავრებოდით ყაზახეთში, სადაც დაგეგმილი იყო ტურნირი. უნდა ჩავსულიყავით 6 დღით ადრე და კარანტინში უნდა ვყოფილიყავით. 6 დღე კარანტინში მებრძოლის გაჩერება წარმოუდგენელია, აუცილებლად წავაგებდით. ჩვენ იქ წასვლა გვინდოდა კარგი ბრძოლის საჩვენებლად და არა რაღაც „ხურდებზე“ საჩხუბრად.
გიგი შალამბერიძე სახელმწიფოს, ან კერძო სექტორის მხრიდან მხარდაჭერის აუცილებლობაზეც საუბრობს:
– გულდასაწყვეტია, რომ ჩვენ მივემგზავრებით სხვადასხვა ქვეყნებში და ჩვენი მეტოქეები ბევრად მაგრად ემზადებიან, ვიდრე ჩვენ. მათ უფრო დიდი თანადგომა აქვთ სახელმწიფოს მხრიდან. დღეს დღეობით სპორტი ძაან განვითარდა. ზოგადად, სპორტის დინამიკა გაიზარდა. ნებისმიერი სპორტის სახეობა არის გადასული გამძლეობაზე და ჩვენც ვცდილობთ რომ ჩვენს ხელთ არსებული რესურსიდან მაქსიმუმი გამოვიყვანოთ. მაგრამ, ცოტა მეტი მხარდაჭერა რომ გვქონდეს, რეალურად უფრო კარგ საქმეს გავაკეთებდით.
დაფინანსების სიმწირის მიუხედავად, გასული რამდენიმე წლის განმავლობაში „ალფაგრინმა“ რამდენიმე მნიშვნელოვანი ტურნირი ჩაატარა, მათ შორის ერთ-ერთი კი 2019 წლის იანვარში, სასჯელაღსრულების ნომერ მე-16 დაწესებულებაში ჩატარდა:
– შარშან ერთი შეჯიბრი ჩავატარეთ 2019 წლის 26 იანვარს სასჯელაღსრულების ნომერ მე-16 პენიტენციურ დაწესებულებაში. ეს იყო უპრეცედენტო შემთხვევა, იმიტომ რომ მსოფლიო პენიტენციურ ისტორიაში იყო პირველი შეჯიბრი, რომელიც საპატიმროში ჩატარდა. მაშინ მხოლოდ მე ვიყავი მსჯავრდებული. მაშინ 8 მებრძოლი იყო ჩვენი კლუბიდან და 9 მებრძოლი ჩამოვიდა აზერბაიჯანიდან. ეს ყველაფერი მიეძღვნა ქალთა ძალადობის წინააღმდეგ ამოქმედებულ კამპანიას.
ერთი საინტერესო პროექტი, რომელსაც „ალფაგრინი“ ახორციელებს, ძალადობის მსხვერპლი ქალების მხარდაჭერაა. გიგი შალამბერიძე განმარტავს, რომ კლუბში აქტიურად მიმდინარეობს ოჯახში ძალადობის მსხვერპლი ქალების მიღება, რომელთაც კლუბის წევრები სხვადასხვა ფორმით ეხმარებიან.
– ჩვენ ვართ მებრძოლები, ვართ ძლიერები და ვიცავთ მათ, ვისაც დაცვა სჭირდებათ. ვცდილობთ, რომ ყველანაირად მათ გვერდით ვიყოთ. ჩვენს კლუბში გვყავს ქალბატონები, რომლებიც ოჯახური ძალადობის მსხვერპლნი არიან. ისინი მოდიან ჩვენთან, ვეხმარებით, ასევე გვაქვს ფსიქოლოგიური დახმარების ტრენინგები, ვასწავლით თავდაცვას და განიარაღებას. ნებისმიერ მსურველს შეუძლია დაკავშირება. ჩვენი ტელეფონის ნომრები მითითებულია ალფაგრინის Facebook და Instagram-გვერდზე. შემდეგ უკვე პირადად გასაუბრებით გავარკვევთ რა და როგორ გავაკეთოთ.
გიგი შალამბერიძემ სამომავლოდ დაგეგმილ პროექტებზე ისაუბრა და განაცხადა, რომ უახლოეს პერიოდში „ალფაგრინის“ წევრები UFC-ში იასპარეზებენ. თუმცა, ამავდროულად კიდევ ერთხელ გაუსვა ხაზი დაფინანსების აუცილებლობას, წინააღმდეგ შემთხვევაში ამ მიზნის მიღწევა გაჭირდება.
– ჩვენმა ერთ-ერთმა მწვრთნელმა ლაშა შელიამ გააფორმა 24-თვიანი კონტრაქტი UFC-ის ერთ-ერთ მენეჯერთან, რომელიც მართავს ბრძოლებს სხვადასხვა ქვეყნებში. ახლა, ერთ-ერთ ასეთ ბრძოლაზე ჩვენგან მიემგზავრებოდა ორი მებრძოლი, ბეკო დოიჯაშვილი და ლევან ღითაძე. 23 იანვარს უნდა გამართულიყო ხორვატიაში, მაგრამ მწვავე პანდემიური მდგომარეობის გამო ეს ბრძოლა გადაიდო თებერვლისთვის. შემდეგი ბრძოლა იქნება ლას-ვეგასში და შემდეგ უკვე UFC-ში მოგვიწევს ბრძოლები. ახლა გვაქვს მოლაპარაკება ორ წამყვან და ძლიერ ორგანიზაციასთან, რომელთა სახელწოდებასაც არ დავასახელებ სანამ ორმხრივი შეთანხმება არ გვექნება, მაგრამ ძალიან სასიხარულო იქნება ჩვენთვის და ქართველი სპორტსმენებისთვის. მათ მებრძოლებს აქვთ ლიცენზიები, დადიან დღეში ორჯერ-სამჯერ და ვარჯიშობენ, იტარებენ PCR ტესტებს, რისთვისაც ჩვენც მზად ვართ. ყოველ მესამე ან მეოთხე დღეს ჩავიტარებთ. იმის უფლება რომ გვქონდეს, რომ დარბაზში მოვემზადოთ 1-2 საათით, ძალიან მადლობელი ვიქნებით და საქართველოს დროშასაც ბევრად მეტჯერ ავწევთ.
