2020 წელი ქართული ძიუდოსთვის მაჟორულ ნოტაზე სრულდება. ორი ქართველი კიმონოისტი, ძიუდოს საერთაშორისო გამოკითხვაში თავიანთ ნომინაციებში საუკეთესოებად დაასახელეს.
საუბარია ტატო გრიგალაშვილზე და ლუხუმ ჩხვიმიანზე, რომლებიც შესაბამისად „ამომავალი ვარსკვლავის“ და წლის ძიუდოისტის ნომინაციებში მონაწილეობდნენ. საერთაშორისო ფედერაციის გამოკითხვა 21 დეკემბერს შეწყდა, გამარჯვებულები კი დღეს გამოვლინდნენ.
ტატო გრიგალაშვილმა 2020 წელს ჯერ 23 წლამდე ევროპის ჩემპიონატი მოიგო, მოგვიანებით კი უკვე დიდებში გახდა კონტინენტის ჩემპიონი, რომელიც პრაღაში გაიმართა.
რაც შეეხება ლუხუმ ჩხვიმიანს, მან 2019 წელს, ტოკიოში გამართული მსოფლიო ჩემპიონატი მოიგო.
