25 წლის ქართველი მცველი, გაგი მარგველაშვილი კარიერას “შკუპში” გააგრძელებს. ინფორმაციას ჩრდ.მაკედონიური გუნდი სოციალურ ქსელში ავრცელებს.
ახალგაზრდა ფეხბურთელმა ჩრდ.მაკედონიურ გუნდთან ხელი 2-წლიან ხელშეკრულებას მოაწერა.
25 წლის მცველმა ახალ გუნდში გადასვლის შემდეგ მედიასთან მცირე კომენტარი გააკეთა:
“ძალიან მიხარია აქ ყოფნა. ამ გუნდში საკმაოდ კარგი ატმოსფეროა. ასევე, შკუპს ჰყავს უაღრესად პროფესიონალი მწვრთნელი და მიხარია მასთან მუშაობა. შკუპი კარგ ფეხბურთს თამაშობს, ბევრ გოლი გააქვს და ძალიან ცოტას უშვებს, ძალიან კარგი ფეხბურთელების წყალობით.
მაკედონიის ლიგაში საფეხბურთო კლუბი შკუპი იბრძვის ტიტულისთვის და მე მუდმივად ვიმუშავებ, რათა მივაღწიოთ ჩვენს მიზნებს. მინდა გავიმარჯვოთ და ჩემპიონობა ერთად ვიზეიმოთ, ასევე მინდა ევროტურნირებზეც კარგი შედეგი დავდოთ.
ასევე, ბედნიერი ვარ, რომ ამ კლუბს გულშემატკივრების მხრიდან დიდი მხარდაჭერა მაქვს და გპირდებით, რომ ამ მაისურის ფერებს მაქსიმალურად დავიცავ.” – განაცხადა გაგი მარგველაშვილმა.
ცნობისთვის, გაგი მარგველაშვილმა გასულ სეზონში ბათუმის “დინამოსთან” ერთად საქართველოს ჩემპიონატი მოიგო, ახალგაზრდა მცველმა ზღვისპირელთა მაისურით ჩატარებულ 11 შეხვედრაში 2 გოლი გაიტანა.
აღსანიშანვია, რომ ”შკუპი” ჩრდ.მაკედონიის ჩემპიონატში 18 ტურის შემდეგ, 42 ქულით პირველ ადგილს იკავებს.
