“გენტის” მთავარი მწვრთნელი ჰეინ ვანჰეზებრუკი გუნდში არსებულ საკადრო პრობლემებზე საუბრისას გიორგი ჩაკვეტაძეზეც ილაპარაკა და თქვა, რომ “ანდერლეხთან” ჩაკვეტაძის თამაშით კმაყოფილი დარჩა.
“ჩაკვეტაძის მონდომებითა და მუშაობით კმაყოფილი ვარ. მას მეტისმეტად უხდებოდა თადაცვითი ფუნქციების შესრულება, მაგრამ ეს დიდწილად გუნდის მიზეზით ხდებოდა, რომელიც უკან დიდი ძალებით იხევდა. ტოპთამაშებში საკუთარ თავზე პასუხისმგებლობის აღებაა საჭირო და არა გარშემო ციხესიმაგრის აგება. ნახევარმცველები გამოეთიშნენ და თავდამსხმელებიც კი უკან იხევდნენ. ასეთ დროს ბურთს ვერ გააკონტროლებ. მიუხედავად ამისა, მომეწონა, რომ მან თავისი დაცვითი მოვალეობები კარგად შეასრულა და ძირითადად ფლანგიდან გადაცემების ჩაჭრაზე ზრუნავდა”, – ამბობს გენტის მთავარი მწვრთნელი.
შეგახსენებთ, რომ 22 წლის ქართველი ნახევარმცველი ბელგიური გუნდის სასტარტო შემადგენლობაში ერთწლიანი პაუზის შემდეგ პირველად, სტუმრად ანდერლეხტთან დაპირისპირებაში გამოჩნდა. მატჩი ფრედ 1:1 დასრულდა, გიორგიმ კი 66 წუთამდე ითამაშა.
ბელგიის ჟუპილერ ლიგაში გასული 8 ტურის შემდეგ, “გენტს” 8 ქულა აქვს და სატურნირო ცხრილში მე-14 პოზიციაზეა.
