„მარსელს“ კარგი დროება არ უდგას. ერთ დროს ყველასთვის მრისხანე ფრანგული კლუბი, რომელსაც ოთხმოცდაათიან წლებში ჩემპიონთა ლიგაც აქვს მოგებული, ევროპაში ისე ყინჩად ვეღარ გამოიყურება და ამის გამო ქომაგების გარდა, ჟურნალისტებიც წუხან.
ჩემპიონთა ლიგაზე „მარსელმა“ მხოლოდ ერთი მატჩი მოიგო და 3 ქულით ჯგუფში ბოლო ადგილი დაიკავა, რაც იმას ნიშნავს, რომ კლუბი ვერც ევროპა ლიგაზე გადაერთო, ხოლო საფრანგეთის ჩემპიონატის ბოლო ტურში „რენთან“ 1:2 წააგო და მეოთხე ადგილამდე ჩამოქვეითდა.
მატჩისშემდგომ პრესკონფერენციაზე „მარსელის“ მთავარი მწვრთნელი ანდრე ვილაშ ბოაში ისედაც ნირწამხდარი იყო და უფრო მეტად გაღიზიანდა, როდესაც დარბაზში იმ ჟურნალისტს მოჰკრა თვალი, რომელმაც რამდენიმე დღით ადრე, გამოცემა La provence-ში მასზე კრიტიკული სტატია დაბეჭდა.
„გმადლობთ. შეგიძიათ ასე გააგრძელოთ. მე შენ დაგიჭერ. თუ ამის შანსი მომეცემა, აუცილებლად დაგიჭერ“ – ამ სიტყვებით შემოსწყრა ბოაში ჟურნალისტს.
პორტუგალიელი სპეციალისტის საუკეთესო დრო ალბათ წარსულს ჩაბარდა. ერთი პერიოდი ის პრემიერლიგაში წარმატებით მუშაობდა და „ჩელსის“ წრთვნიდა, ხოლო 2015 წელს სანქტ-პეტერბურგის „ზენიტი“ რუსეთის ჩემპიონი გახადა.
