ესპანეთის ლა ლიგაში წარმატებული დებიუტის შემდეგ „ვალენსიამ“ თბილისის „დინამოსგან“ დაჩქარებული წესით გამოსყიდვა გადაწყვიტა. ინფორმაციას ესპანური მედია ავრცელებს.
რამდენიმე ავტორიტეტული სააგენტოს ცნობით, კლუბის ხელმძღვანელები „ხეტაფეს“ წინააღმდეგ ქართველი მეკარის თამაშით აღფრთოვანებულები დარჩნენ და მისი ძირითად გუნდში გამწესება გადაწყვიტეს. თავდაპირველი შეთანხმებით, მამარდაშვილი „ღამურების“ მესამე მეკარედ მოიაზრებოდა და მეორე გუნდში უნდა ეთამაშა, თუმცა მადრიდულ კლუბთან ჩატარებული შეხვედრის შემდეგ გადაწყდა, რომ კლუბი მას პირველ გუნდში თამაშის შესაძლებლობა უნდა მიეცეს.
ცნობისთვის, „ვალენსიამ“ თბილისურ კლუბთან ფეხბურთელის თაობაზე 1-წლიანი იჯარა გააფორმა, თუმცა ვადაზე ადრე ყიდვის შემთხვევაში, კონტრაქტით გათვალისწინებული თანხა დაიკლებს და ესპანური კლუბი მამარდაშვილის ტრანსფერში უფრო ნაკლებ ფულს გადაიხდის (დაახლოებით 500 ათასი ევრო), სხვა შემთხვევაში კი საფასური 1 მილიონი ევრო იქნება.
შეგახსენებთ, რომ გიორგი მამარდაშვილი თბილისის „დინამოს“ აღზრდილი და საკუთრებაა, რომელიც ბოლოს თბილისის „ლოკომოტივში“ იჯარის წესით თამაშობდა. სწორედ „ლოკოდან“ წავიდა ქართველი მეკარე „ვალენსიაში“. 13 აგვისტოს მას ლა ლიგაშიც ჰქონდა დებიუტი და „ხეტაფესთან“ 1:0 მოგებულ შეხვედრაში თავი არაერთი ეფექტური სეივით დაგვამახსოვრა.
