საქართველოში ლაშა ბექაურის სახელობის დარბაზი აშენდება, ამის შესახებ საქართველოს პრემიერ-მინისტრმა ირაკლი ღარიბაშვილმა სოფელ არხილოსკალოში განაცხადა, სადაც ოლიმპიურ ჩემპიონ ლაშა ბექაურთან ერთად ჩავიდა.
„ეს არის უდიდესი სიხარული ჩვენი ქვეყნის, მთელი ერის და განსაკუთრებით, აი, ამ რაიონის მცხოვრებლებისთვის. მინდა, ლაშას, ამ გმირ კაცს, კიდევ ერთხელ მივულოცოთ ეს უდიდესი გამარჯვება. ეს არის ჩვენი სიამაყე. დღეს მე ლაშას ვაცნობე, რომ მისი სახელობის ახალი დარბაზი აშენდება”, – განაცხადა ირაკლი ღარიბაშვილმა.
შეგახსენებთ, რომ იაპონიის დედაქალაქში ოლიმპიური თამაშები 8 აგვისტოს დასრულდება, საქართველოს გუნდმა კი, რომელიც 35 სპორტსმენისგან შედგებოდა, გამოსვლა უკვე დაასრულა. ქართველი სპორტსმენების ანგარიშზე ტოკიოში 8 მედალია: 2 ოქრო, 5 ვერცხლი და 1 ბრინჯაო. ჩემპიონები ძიუდოისტი ლაშა ბექაური და ძალოსანი ლაშა ტალახაძე გახდნენ.
