საქართველოს პრემიერ-მინისტრმა, ირაკლი ღარიბაშვილმა ლეგენდარულ ქართველ ძალოსანს, ლაშა ტალახაძეს ტოკიოს ოლიმპიური ჩემპიონობა მიულოცა.
მთავრობის მეთაურმა ქართველ სპორტსმენს ტოკიოში დაურეკა და პირადად ესაუბრა.
შეგახსენებთ, რომ ლაშა ტალახაძემ დღეს ტოკიოს ოლიმპიურ თამაშებზე ოქროს მედალი მოიპოვა და ოლიმპიური ჩემპიონობა მეორედ იზეიმა. დამოუკიდებელი საქართველოს ისტორიაში ტალახაძე პირველი სპორტსმენია, რომელმაც ოლიმპიადა ორჯერ მოიგო.
ამ დროისთვის, ტოკიოს ოლიმპიადაზე ქართული დელეგაციის ანგარიშზე 7 მედალია – 2 ოქრო, 4 ვერცხლი, 1 ბრინჯაო. ლაშა ტალახაძის გარდა ოლიმპიური ჩემპიონი ძიუდოისტი ლაშა ბექაური გახდა. ასევე ძიუდოისტებმა ვაჟა მარგველაშვილმა, ლაშა შავდათუაშვილმა და გურამ თუშიშვილმა ვერცხლის მედლები მოიპოვეს, ვერცხლის მედალია ბერძნულ-რომაული სტილით მოჭიდავე იაკობ ქაჯაიას ანგარიშზეც, ბრინჯაოს პრიზიორი კი ძალოსანი ანტონ პლესნოი გახდა.
