გონების დაძაბვა სულაც არ არის საჭირო იმ ფეხბურთელების გასახსენებლად, რომლებსაც კარიერის მანძილზე ტრავმებმა ხელი დარია და არაერთი მნიშვნელოვანი ტურნირი გამოატოვებინა.
ერთ-ერთი ასეთი კი უდავოდ მარკო როისია. დორტმუნდის „ბორუსიას“ და გერმანიის ნაკრების ფეხბურთელს კარიერის მანძილზე უიღბლობა მუდამ თან სდევდა, რაზეც ისიც მეტყველებს და როისმა 2014 წლის მსოფლიოს და 2016 წლის ევროპის ჩემპიონატები სწორედ ტრავმის გამო ვერ ითამაშა.
მოახლოებულ ევრო 2020-ზეც, გერმანიის ნაკრების ქომაგებს როისის იმედი აღარ უნდა ჰქონდეთ. არა, ამ შემთხვევაში ტრავმა არაფერ შუაშია. ეს გადაწყვეტილება თავად ფეხბურთელმა, ნაკრების მთავარ მწვრთნელთან იოახიმ ლიოვთან შეთანხმების საფუძველზე მიიღო.
„დამღლელი და გადატვირთული სეზონი მქონდა, რომელიც მეტ-ნაკლებად წარმატებული გამოდგა. იოახიმ ლიოვთან ვისაუბრე და შევთანხმდით, რომ ამ ეტაპზე ევროპის ჩემპიონატზე ჩემი მონაწილეობა არ ღირს.
ამ გადაწყვეტილების მიღება ჩემთვის ძალზედ რთული იყო, რადგან ნაკრების მაისურით თამაში ყოველთვის მსიამოვნებს და სულერთი არ არის. დამღლელი სეზონის შემდეგ, ჩემს თავს დასვენების და აღდგენის უფლება უნდა მივცე. გამოვიყენებ შანსს და მოვძლიერდები, რათა ახალი სეზონი მძლავრად და მეტი შემართებით დავიწყო.
გერმანიის ნაკრებს ევროპის ჩემპიონატზე წარმატებებს ვუსურვებ. ჩვენ გუნდს ტელევიზორთან გადაჯვარედინებული თითებით ვუგულშემატკივრებ“ – აღნიშნავს მარკო როისი.
