ყაზანში მიმდინარე ძიუდოისტთა გრანდ-სლემის მეორე საშეჯიბრო დღე, პირველთან შედარებით საქართველოს ნაკრებისთვის არცთუ ისე წარმატებული გამოდგა.
შეგახსენებთ, გუშინ ყაზანში გაშლილ ტატამზე ჩემპიონობა ლუხუმ ჩხვიმიანმა იზეიმა, ხოლო ბაგრატ ნინიაშვილს ბრინჯაოს მედლამდე სულ ცოტა დააკლდა.
დღეს კი 3 ქართველი ძიუდოისტიდან მედალი მხოლოდ ნუგზარ ტატალაშვილმა (73კგ) მოიპოვა, თუმცა ხარისხობრივად სხვა სინჯის – ბრინჯაო.
ნუგაზრ ტატალაშვილი ნახევარფინალამდე ერთი ამოსუნთქვით მივიდა. მან ერთი-მეორეს მიყოლებით ბერძენი, ფილიპინელი, აზერბაიჯანელი და რუმინელი მეტოქეები დაამარცხა, ხოლო ფინალში გადასასვლელი ბრძოლა რუს აიუბ ხაჟალიევთან დათმო. ბრინჯაოს მედლის ფინალში კი ქართველმა კიმონოისტმა ბელარუსი ვადიმ შოკა დაჯაბნა.
რაც შეეხება კიდევ ორ ქართველ ძიუდოისტს, ლუკა კაპანაძე (73კგ) ტურნირს სასტარტო ეტაპზევე ბულგარელ მოწინააღმდეგესთან მარცხით გამოეთიშა, ხოლო ვლადიმერ ახალკაცი ბელგიელ მეტოქეს დაეჩაგვრინა.
ამრიგად, ორი საშეჯიბრო დღის შემდეგ, საქართველოს ნაკრების ყულაბაში თითო-თითო ოქრო და ბრინჯაო ჩხრიალებს.
