ლა-ლიგის 33-ე ტურის გამოტოვებულ მატჩში, „ბარსელონამ“ უმნიშვნელოვანესი ქულები დაკარგა და შინაურ არენაზე „გრანადასთან“ 1:2 წააგო.
ეს მარცხი საჩემპიონო ბრძოლაში შესაძლოა გარდამტეხიც აღმოჩნდეს. „ბლაუგრანა“ ლიდერ „ატლეტიკოს“ 2 ქულით ჩამორჩება, ხოლო „რეალთან“ თანაბრად არის. არადა, „გრანადასთან“ გამარჯვების შემთხვევაში კატალონიური გრანდი ერთპიროვნული ლიდერი ხდებოდა.
მარცხი მარცხად და „გრანადასთან“ დაპირსპირების დროს „ბარსელონას“ სხვა პრობლემებიც შეექმნა. კატალონიელების მთავარი მწვრთნელი მატჩის მიმდინარეობის დროს ძალზედ გაწიწმატდა და მთავარ მსაჯს უხეშად მიმართა.
„რა ტიპი ხარ“? დაუყვირა კუმანმა არბიტრს, რის გამოც წითელი ბარათი მიიღო. მოგვიანებით, ესპანეთის ფეხბურთის ფედერაციის სადისციპლინო კომიტეტმა ამ საკითხზე იმსჯელა და რონალდ კუმანი ორ მატჩიანი დისკვალიფიკაციით დასაჯა.
რა თქმა უნდა, „ბარსელონა“ ამ ვერქდიქტთან შეგუებას არ აპირებს და გასაჩივრებას გეგმავს. თუ გადაწყვეტილება არ შეიცვალა, მაშინ რონალდ კუმანს „ვალენსიასთან“ და „ატლეტიკოსთან“ გასამართი უმნიშვნელოვანესი მატჩების გამოტოვება მოუწევს.
