დღეს, გერმანიის დედაქალაქ ბერლინში „ევრობასკეტ 2022“-ზე საქართველოს კალათბურთელთა ნაკრების მეტოქეები გაირკვა. ჩვენი გუნდი ესპანეთის, რუსეთის, თურქეთის, ბულგარეთის და ბელგიის ნაკრებებს შეხვდება. ყველა მატჩი თბილისში, სპეციალურად „ევრობასკეტისთვის“ აშენებულ დარბაზში ჩატარდება.
„პრაიმ სპორტი“ ვეტერან კალათბურთელს და ამჟამად საქართველოს ნაკრებში, ილიას ზუროსის ასისტენტს, მანუჩარ მარკოიშვილს დაუკავშირდა და კენჭისყრის შეფასება სთხოვა.
„დავიწყებ ესპანეთით. მსოფლიოს მოქმედი ჩემპიონი ჩამოდის და ეს მაყურებლისთვისაც კარგი სანახაობა იქნება. თბილისში მსოფლიო დონის ვარსკვლავები ითამაშებენ, რაც ბუნებრივია კარგია. ნამდვილად არ არის მარტივი ქვე-ჯგუფი. თურქეთის და რუსეთის შესახებ ასე თუ ისე ვიცოდით. თურქეთი ჩვენ ავირჩიეთ, რუსეთი კი ავტომატურად ხვდებოდა ჩვენს ჯგუფში. აქედან გამომდინარე, რაღაც რისკებზე წასული ვიყავით, შეიძლება ასეც ითქვას.
რაც შეეხება დანარჩენ მეტოქეებს, ვიქტორმა ძალიან კარგად ამოიღო კალათიდან ბელგია და ბულგარეთი. მიზანი რა თქმა უნდა ქვე-ჯგუფიდან გასვლაა, მაგრამ ერთადერთი საწყენი ის არის, რომ გასვლის შემთხვევაში ვხვდებით გერმანიის ქვე-ჯგუფს და ალბათ ყველა ნახავდით იქ როგორი გუნდები არიან. ნუ გავასწრებთ მოვლენებს, მაგრამ მგონია, რომ მაგაში არ გაგვიმართლა.
მიზანი რა თქმა უნდა ახლადაშენებულ მოედანზე ჩვენი გულშემატკივრების თანდასწრებით კარგი კალათბურთის ჩვენება და ჯგუფიდან გასვლა იქნება. გულშემატკივრებს ვპირდებით, რომ ყოველ თამაშზე მოსაგებად გავალთ და მაქსიმალურად დავიხარჯებით. რა თქმა უნდა ეს ადვილი არ იქნება, მაგრამ ბიჭები ამისთვის ყველაფერს გააკეთებენ და ჩვენც მაქსიმალურად შევუწყობთ ხელს“, – განაცხადა მანუჩარ მარკოიშვილმა.
