24 აპრილს, თბილისში საბრძოლო კლუბ „ალფა გრინის“ ორგანიზებით MMA-ში საერთაშორისო ტურნირი გაიმართება. შეჯიბრში მონაწილეობას 6 ქვეყნის 26 სპორტსმენი მიიღებს, მათ შორის კი არაერთი ტიტულოვანი ქართველი მებრძოლი იქნება.
საგულისხმოა, რომ ტურნირი ქალთა მიმართ ძალადობის წინააღმდეგ იქნება მიმართული და ღონისძიებიდან შემოსული თანხის 25% ძალადობასთან მებრძოლ ერთ-ერთ ორგანიზაციას გადაერიცხება.
ტურნირის საორგანიზაციო მხარეებზე ერთ-ერთმა ორგანიზატორმა და მებრძოლმა, გიგი შალამბერიძემ „მთავარი არხის“ ეთერში ისაუბრა.
„ჩვენ პირველი შეჯიბრი ჩავატარეთ 2019 წელს, N16 პენიტენციურ დაწესებულებაში. მსოფლიოში ეს იყო პირველი პრეცედენტი, როდესაც პენიტენციურ დაწესებულებაში მოხდა შერეულ ორთაბრძოლებში შეჯიბრის ჩატარება და მაშინაც, გავაკეთეთ ქალთა მიმართ ძალადობის წინააღმდეგ. ზოგადად, ძალისმიერი სპორტსმენები ვფიქრობთ, რომ თუ ადამიანს ძალის მოსინჯვა უნდა, უნდა გასინჯოს ძალისმიერ სპორტში და არა ქალის წინააღმდეგ.
ჩვენ გავაფორმეთ ერთწლიანი მემორანდუმი ძალადობისგან დაცვის ეროვნულ ქსელთან, სადაც ჩვენი ვალდებულება იქნება ყოველი ჩატარებული შეჯიბრიდან, რომელიც თვეში ერთხელ გაიმართება, მიღებული თანხის 25% გადაირიცხება ამ ორგანიზაციაში. ამასთან, პერიოდულად გავგზავნით ჩვენს მწვრთნელებს სხვადასხვა ღონისძიებების ჩასატარებლად და ვასწავლით თავდაცვას“, – განაცხადა გიგი შალამბერიძემ.
