გიორგი შერმადინმა „ლენოვო ტენერიფეს“ შემადგენლობაში მორიგი წარმატებული მატჩი ჩაატარა. ქართველი კალათბურთელის გუნდი ჩემპიონთა ლიგის მე-4 ტურში საკუთარ მოედანზე უკრაინულ „პრომეთეის“ შეხვდა და დაძაბულ შეხვედრაში ორი ქულის სხვაობით, 80:78 დაამარცხა.
ქართველმა ცენტრმა მატჩი სასტარტო ხუთეულიდან დაიწყო და მოედანზე არასრული 17 წუთი გაატარა. ამ დროის განმავლობაში შერმამ საკუთარ ანგარიშზე 14 ქულა, 2 მოხსნა და 2 შედეგიანი გადაცემა დააფიქსირა. ქართველმა კალათბურთელმა 8-დან 6 ორქულიანი და 4-დან 2 საჯარიმო ჩააგდო. ამასთან, ბურთი ერთხელ დაკარგა და 3 პერსონალური ფოლი მიიღო.
„ტენერიფე“ ჩემპიონთა ლიგაზე მომდევნო შეხვედრას 8 დეკემბერს, „ლუდვიგსბურგის“ წინააღმდეგ გამართავს.
