ნოვაკ ჯოკოვიჩმა შესაძლოა მელბურნში ტიტული დაცვა ვერ მოახერხოს. არა, სერბი უკვე მერვედფინალშია და წინ მილოშ რაონიჩთან ურთულესი დაპირისპირება ელის, მაგრამ არც ის არის გამორიცხული ნოლე კორტზე საერთოდ ვერ გავიდეს.
მესამე წრეში ტეილორ ფრიცთან დრამატული გამარჯვება მან ტრავმის ფონზე მიაღწია. მსოფლიოს პირველმა ჩოგანმა მუცლის კუნთები დაიზიანა და სამედიცინო დახმარება დასჭირდა. ჯოკოვიჩმა მატჩი ტკივილების თანხლებით გააგრძელა და საბოლოოდ 5 სეტიან თრილერში იმარჯვა.
„არც კი ვიცი მომდევნო მატჩში თამაშს მოვახერხებ თუ არა. ორ დღეში სრულად მომჯობინება ალბათ გაჭირდება, თუმცა იმედია ტურნირიდან მოხსნას გადავურჩები“ – აღნიშნა ჯოკოვიჩმა მატჩის შემდგომ პრესკონფერენციაზე.
ამასობაში ნოვაკ ჯოკოვიჩმა როჯერ ფედერერის რეკორდი გააუმჯობესა. საუბარია 5 სერიანი დაპირისპირებების მოგებაზე. სერბისთვის ფრიცთან 5 სეტიან მატჩში გამარჯვება კარიერაში 33-ე იყო, რკინის როჯერს კი ეს 32-ჯერ ჰქონდა გაკეთებული.
რაც შეეხება უშუალოდ ავსტრალიის ღია პირველობას, ამ მხრივ თანაფარდობაა. მელბურნში, სერბსაც და შვეიცარიელ ლეგენდასაც 5 სეტიან მატჩებში 30-30 გამარჯვება აქვთ მოპოვებული.
