ხვალ, საქართველოს რაგბის კავშირის პრეზიდენტის ხელახალი არჩევნები გაიმართება. პრეზიდენტობის კანდიდატად მხოლოდ ერთი ადამიანი, იოსებ ტყემალაძე დარეგისტრირდა, რომელიც 24-მა ნამდვილმა წევრმა წარადგინა.
ირაკლი აბუსერიძე, რომელმაც 30 დეკემბერს ჩატარებულ არჩევნებში გაიმარჯვა, სოციალურ ქსელში სპეციალურ განცხადებას ავრცელებს და ხვალ გასამართ საპრეზიდენტო არჩევნებს ემიჯნება.
მისი თქმით, ხვალ რაგბის კავშირის პრეზიდენტად იოსებ ტყემალაძის არჩევა უკანონო იქნება. ირაკლი აბუსერიძის განცხადებას უცვლელად გთავაზობთ:
„ხვალ, 2021 წლის 24 თებერვალს, ქართული რაგბისთვის არაკეთილის მოსურნე ხალხი, ყველა ჩვენი წარმატების, ყოველი დადებული ლელოს, გულშემატკივრის სიხარულის, მუხლჩაუხრელი შრომის, ვარჯიშის, ბრძოლის წყალში ჩაყრას შეეცდება!
ერთ, რაგბთან არაფერ შუაში კაცს – მშენებელ იოსებ ტყემალაძეს, რაგბის კავშირის პრეზიდენტობის უკანონოდ გაფორმება სურს (ალბათ ისიც კი არ იცის, ლელო რამდენი ქულაა).
მივმართავ ყველა იმ სარაგბო კლუბს, ვინც მშენებელი იოსებ ტყემალაძე კანდიდატად წარადგინა. მივმართავ ამ კლუბების ადმინისტრაციას და მორაგბეებს: მე და ჩემი გუნდი გაგებით ვეკიდებით თქვენს გადაწყვეტილებას, რადგან კარგად ვიცით როგორი ზეწოლის და მუქარის პირობებში გიწევთ ამ ნაბიჯის გადადგმა, თუმცა სრული პასუხისმგებლობით ვაცხადებთ: ყველასთვის საბედნიეროდ, მშენებელი იოსებ ტყემალაძე, ხვალ რაგბის კავშირის პრეზიდენტი ვერ გახდება!
მშენებელი იოსებ ტყემალაძე ვერ და არ დააკომპლექტებს საქართველოს ნაკრების სამწვრთნელო შტაბს! ვერ და არ გადაწყვიტავს საქართველოში საკლუბო რაგბის განვითარების ბედს, ახალგაზრდებში რაგბის პოპულარიზაციის ბედს, ქართველ მწვრთნელთა კვალიფიკაციის ამაღლების საკითხს, რადგან მშენებელი იოსებ ტყემალაძის წინააღმდეგ დგას ქართული რაგბი! მე, ბორჯღალოსანი კაპიტანი, საქართველოს რაგბის კავშირის ლეგიტიმური პრეზიდენტი ირაკლი აბუსერიძე, ჩემი გუნდი და საქართველოს 18 სარაგბო კლუბის წარმომადგენელი! ჩვენ არ ვაპირებთ ხვალინდელ უკანონობაში მონაწილეობის მიღებას. ხვალ, არჩევნების ჩასატარებლად საჭირო ქვორუმი ვერ შედგება!
თხოვნით მოგმართავთ ჟურნალისტებს, სათითაოდ გამოკითხეთ ყველა სარაგბო კლუბის წარმომადგენელი ვინც ხვალ, რაგბის კავშირში, მშენებელი იოსებ ტყემალაძის მხარდასაჭერად მივა. გამოკითხეთ და აჩვენეთ ქართული რაგბის გულშემატკივრებს ვიღაც, ასევე რაგბთან არაფერ შუაში ხალხი, რომლებმაც კლუბებს ძალით გააფორმებინეს მინდობილობები და მათ მაგივრად აპირებენ ხმის მიცემას. ზოგს საერთოდ ნანახიც არ აქვს რაგბი, არ იცის რამდენი კაცი თამაშობს.
მივმართავთ მშენებელ იოსებ ტყემალაძეს: იოსებ, ხვალ შენ ქართულ რაგბს ხელში ვერ ჩაიგდებ! ეხლა დაჯექი და იფიქრე რამდენი ბოდიშის მოხდა მოგიწევს და რა ზომა-წონის ხალხი გადაგვიმტერე. იფიქრე! შენი პროფესიის კაცი, ორ აგურს სადმე იშოვნის!
და ბოლოს, მინდა ვკითხო ბაჩო ხურციძეს: ამ მშენებელი კაცის მოსაყვანად იბრძოდი ბაჩო?! ბოლომდე სამშენებლო კომპანიად გინდოდა რაგბის კავშირის გადაკეთება?!“ – წერს აბუსერიძე.
შეგახსენებთ, რომ ირაკლი აბუსერიძემ 30 დეკემბერს გამართულ რაგბის კავშირის საპრეზიდენტო არჩევნებში დელაგატთა ხმების უმრავლესობა მოიპოვა და არჩევნებში გაიმარჯვა. 6 იანვარს საჯარო რეესტრმა მისი პრეზიდენტად რეგისტრაციის პროცესი შეაჩერა. უწყების განმარტებით, აბუსერიძის მიერ წარდგენილი დოკუმენტებით დადგინდა, რომ კრებაზე, სადაც იგი კავშირის პრეზიდენტად უნდა აერჩიათ, საკმარისი კვორუმი არ იყო.
ირაკლი აბუსერიძემ საჯარო რეესტრის გადაწყვეტილება გაასაჩივრა, თუმცა უწყებამ მისი სარჩელი არ დააკმაყოფილა.
შედეგად, რაგბის კავშირის გამგეობამ ხელახალი არჩევნები 24 თებერვალს დანიშნა.
