ჩოგბურთის მოყვარულთ ემახსოვრებათ, რომ წლევანდელი ავსტრალიის ღია პირველობა ძალზედ მკაცრი რეგულაციებით გაიმართა, რომელიც თავისთავად პანდემიის გამო იყო გამოწვეული.
ყველაზე მწარე მელბურნული ვოიაჟი თავად ჩოგბურთელებისთვის გამოდგა, რომელთაც ტურნირის დაწყებამდე 14 დღე სასტუმროს ნომრებში გამოკეტილებს მოუხდათ ყოფნა. ორი აზრი არ არსებობს, რომ ამ გამოცდილების ფონზე მათ იგივეს გადატანა აღარ სურთ.
ამიტომაც, არ არის გამორიცხული 2022 წლის ავსტრალიის ღია პირველობა სხვა ქვეყანაში გაიმართოს. ქვეყნის ხელისიფლება მომავალი წლის ზაფხულამდე მკაცრი რეგულაციების შენარჩუნებას გეგმავს, რაც უპირველესად უცხოეთიდან შემოსული ადამიანების კარანტინში ყოფნას გულისხმობს.
ავსტრალიის ჩოგბურთის ფედერაცია და ტურნირის საორგანიზაციო კომიტეტი მთავრობასთან მოლაპარაკებების გამართვას გეგმავს, რათა მეიჯორში მონაწილე ჩოგბურთელები შედარებით მსუბუქ პირობებში იყვნენ.
თუ შეთანხმებას ვერ მიაღწიეს მაშინ მეიჯორის დუბაიში ან დოჰაში გადატანა იგეგმება, სადაც 2021 წელს ავსტრალიის ღია პირველობის საკვალიფიკაციო ეტაპის მატჩები გაიმართა.
