თანამედროვე და არა მხოლოდ, ზოგადად საფეხბურთო ისტორიის ორი სუპერვარსკვლავი – მესი და რონალდო ერთმანეთს მწვანე გაზონზე ისევ დაუპირისპირდნენ და ამ დუელში, პორტუგალიელმა ვიზავი აშკარად დაჩაგრა. „ბარსელონამ“ და „იუვენტუსმა“ ერთმანეთს მოგებები გაუცვალეს. თუ ტურინში, კატალონიელებმა იმარჯვეს და იქ თავი მესის გამოიჩინა, „კამპ ნოუზე“ რონალდოს ბენეფისი შედგა და კუმანის გუნდს ორი პენალტი გაუტანა.
„იუვენტუსმა“ „ბარსელონა“ მაგრად შეარცხვინა და 3:0 გადაურბინა. რა თქმა უნდა, გაწბილებული იყო ესპანური გრანდის მთავარი მწვრთნელი რონალდ კუმანი.
„აგრესია არ გვეყო. თავიდანვე განწირულად გამოვიყურებოდით და მატჩიც საწყის 25 წუთში წავაგეთ. ისეთი შთაბეჭდილება დამრჩა, თითქოს მოედანზე მხოლოდ იმ მიზნით გამოვედით, რომ არ წაგვეგო და არა გამარჯვებაზე დაგეშილები.
დაცვა არასათანადოდ გამოიყურებოდა და საერთოდაც იმ დონეზე ვერ ვითამაშეთ, როგორც გვჩვევია. საერთო ჯამში, ჩემპიონთა ლიგის ჯგუფური ეტაპი მაინც ნორმალურად ჩავატარეთ და ხშირ შემთხვევებში უმაღლესი შეფასებასაც ვიმსახურებდით. თუნდაც იგივე „იუვენტუსთან“ გასვლითი მატჩი გავიხსენოთ, სადაც დამსახურებულად გავიმარჯვეთ.
მსაჯის გადაწყვეტილება? დიახ, თუ რონალდოზე პენალტი იყო, მაშინ მესიზეც უნდა დაენიშნა. საერთო ჯამში კი მხოლოდ ამ მიზეზით არ წაგვიგია, ეს მარცხი უმთავრესაც საკუთარმა უხეშმა შეცდომებმა გამოიწვია. ეს წაგება, სამომავლოდ ჩვენთვის კარგი გაკვეთილი უნდა გამოდგეს“ – თქვა ესპანური გრანდის ჰოლანდიელმა დამრიგებელმა.
