ევრო 2020 უკვე ისტორიის კუთვნილებაა, რომელივ გადაუჭარბებლად შეიძლება ითქვას, რომ შედგა და ტურნირის ისტორიაში ყველასგან გამორჩეული გახლდათ. ჯერ მარტო ის რად ღირს, რომ პირველად ისტორიაში, ევროპის საფეხბურთო ჩემპიონატს რამდენიმე ქვეყნის 12 ქალაქმა უმასპინძლა.
კონტინენტის პირველობა იტალიის ნაკრებმა კი მოიგო და ალბათ დამსახურებულადაც, თუმცა ტურნირის ბომბარდირი რობერტო მანჩინის გუნდის წევრი არ გამხდარა. 5-5 გატანილი გოლით, ევროპის ჩემპიონატის თანაბომბარდირები პორტუგალიელი სუპერვარსკვლავი კრიშტიანო რონალდუ და ჩეხეთის ნაკრების ნიჭიერი ფორვარვი პატრიკ კშიკი გახდნენ.
ეს კი ყველაფერი არ გახლავთ. პატრიკ კშიკმა კიდევ ერთ აღიარებას გამოჰკრა ხელი. ჩეხი შემტევი, უეფამ „ევრო 2020“-ის საუკეთესო გოლის ავტორადაც დაასახელა. ალბათ მიხვდებოდით, საუბარია კშიკის მიერ ჯგუფური ეტაპის პირველ მატჩში შოტლანდიის ნაკრების კარში ცენტრიდან გატანილ ულამაზეს გოლზე. აქვე ისიც დავძინოთ, რომ პატრიკ კშიკი ისტორიაში სხვამხრივაც ჩაეწერა. მის მიერ უნაკლოდ შესრულებული დარტყმა, რომლის შემდეგაც ბურთი შოტლანდიელთა კარის ბადეში გაეხვა ევროპის ჩემპიონატების ისტორიაში ყველაზე გრძელი დისტანციიდან გატანილი გოლი გამოდგა. კშიკმა ბურთშ ფეხი 45,5 მეტრიდან ამოსცხო და როგორც მოგვიანებით გაირკვა „ევრო 2020“-ის საუკეთესო გოლიც გაიტანა.
პატრიკ კშიკის გოლი საუკეთესოდ კი დასახელდა, თუმცა უეფამ ასევე გამოარჩია და ხუთეულში შეიყვანა შვეიცარიის კარში პოლ პოგბას შორეული გასროლა, ხორვატი ლუკა მოდრიჩის იშვიათი სილამაზის გოლი შოტლანდიასთან, იტალიელი ლორენცო ინსინიეს გოლი ბელგიის ნაკრების წინააღმდეგ და კევინ დე ბრუინის უზადო შესრულება ჯგუფურ ეტაპზე დანიელებთან.