ქარიმ ბენზემა ლეგენდების კვალდაკვალ

ლა-ლიგის მორიგ ტურში, „რეალმა“ მძიმე გამარჯვება იზეიმა. სამეფო გუნდმა საკუთარ მოედანზე „ელჩეს“ უმასპინძლა და დაძაბულ ბრძოლაში მინიმალური სხვაობით – 2:1 დაამარცხა.

მადრიდელთაფან დუბლი გაიფორმა ქარიმ ბენზემამ და მის გუნდს უმნიშვნელოვანესი 3 ქულა მოაპოვებინა, მაგრამ ფრანგი ფორვარდისთვის ეს გოლები სხვამხრივაც გამორჩეული გამოდგა.

მოკლედ, ქარიმ ბენზემამ „რეალის“ ლეგენდების გვერდით დაიდო ადგილი. მის ანგარიშზე მიმდინარე სეზონში უკვე 20 გატანილი გოლია. ერთი შეხედვით თითქოს ამაში განსაკუთრებული არაფერია, რადგან ფორვარდების საქმეც ხომ გოლების გატანაა, მაგრამ ძაღლის თავი სხვაგან არის დამარხული.

ქარიმ ბენზემა „რეალის“ მაისურით მინიმუმ 20 გოლის გატანას უკვე ზედიზედ მეცხრე სეზონია ახერხებს. ეს კი უნიკალური მიღწევაა. აქამდე მსგავსი რამ მხოლოდ ლეგენდარულ ალფრედო დი სტეფანოს, „რეალის“ თილისმას რაულ გონსალეს ბლანკოს და სუპერვარსკვლავ კრიშტიანო რონალდუს გაუკეთებიათ.