კეილორ ნავასი მატჩის საუკეთესო ფეხბურთელად შემთხვევით არ დაუსახელებიათ. „პსჟ“-ს კოსტა-რიკელმა მეკარემ ჯამში 9 სეივი შეასრულა და უდიდესი წვლილი შეიტანა, რომ მისმა გუნდმა „ბარსელონასთან“ არ წააგო.
კატალონიურ გრანდს გოლების გატანა განსაკუთრებით პირველ ტაიმში მართებდა. დემბელეს არაერთი განიავებული შანსის გარდა, ლეო მესიმ პენალტიც გააცუდა. არგენტინელს ნავასმა აჯობა. საბოლოოდ ფრე 1:1 და პარიზული გუნდი მეოთხედფინალშია.
პარიზელთა დამრიგებელი მოურისიო პოჩეტინო შედეგით კმაყოფილია, თუმცა თამაშის ხარისხზე რა მოგახსენოთ.
„პირველ დაპირისპირებაში სოლიდური ჰანდიკაპი შევიქმენით. ხალხი ისევ იმ მატჩის შთაბეჭდილების ქვეშ იყო და დღესაც ჩვენგან იგივეს ელოდა. ვიცოდი, რომ იგივე აღარ განმეორდებოდა, რადგან მეტოქე ამის საშუალებას არ მოგვცემდა.
პირველ ტაიმში ცუდად გამოვიყურებოდით. ფეხბურთელები მოედანზე ბევრს წვალობდნენ და დაბნეულები ჩანდნენ.
შესვენებაზე ბიჭებს ცოტა შევუძახე. ვუთხარი, რომ უკმაყოფილო ვიყავი და მათგან მეტს ველოდი. მეორე ტაიმში სხვა გუნდი ვიხილეთ. უფრო ბრძოლისუნარიანი და განსხვავებული ხასიათის მქონე.
მთავარი ის არის, რომ ჩვენ უკვე მომდევნო ეტაპზე ვართ და ტურნირის მოსაგებად წინ მივიწევთ“ – აღნიშნა „პსჟ“-ს არგენტინელმა მთავარმა მწვრთნელმა.
