2018 წლის მუნდიალზე, ახალგაზრდა ფრანგმა ვარსკვლავმა ნიკეს თასი ჩაიხუტა და აკოცა. მას იგივეს გაკეთების დიდი სურვილი აქვს ტოკიოს ოლიმპიადაზეც, ოღონდ ამჯერად მკერდზე ოქროს მედლის ჩამოკიდება და მასთან ამბორი მოუწადინებია.
ბუნებრივია, კილიან მბაპეს ჯერ ასაკი ხელს უწყობს თავისი ქვეყნის ნაკრებს ოლიმპიურ თამაშებზე დაეხმაროს. შეგახსენებთ, ოლიმპიადაზე საფეხბურთო ტურნირი 23 წლამდე ფეხბურთელებს შორის იმართება, თუმცა გუნდებს შეუძლიათ 3 ფეხბურთელი ამ ასაკის ზღვარს მიღმაც დაიმატონ.
კილიან მბაპე კი ორივე კრიტერიუმს აკმაყოფილებს და ფრანგებსაც მისი ტოკიოში წაყვანა სურთ. წინააღმდეგი არც თავად ფეხბურთელია, თუმცა არის ერთი დიდი დაბრკოლება. მოგეხსენებათ, წლეულს ევროპის ჩემპიონატიც იმართება, ხოლო მისი დასრულებიდან ოლიმპიურ თამაშებამდე კი მცირე დრო – სულ 10 დღეა.
არის კიდევ ერთი ხელისშემშლელი ფაქტორიც. მბაპეს მომავალი „პსჟ“-ში ჯერ ისევ არ გარკვეულა. მას პარიზულ გრანდთან კონტრაქტი 2022 წელს ეწურება.
სხვა გამოჩენილ ფეხბურთელთაგან საფრანგეთს ოლიმპიურ ნაკრებში ასევე მიწვეულნი არიან უსმან დემბელე, ტეო ერნანდესი, ედუარდო კამავინგა და ჟიულ კუნდე.
